Ora hende ta insisti pa haci algo cu e no por, of no ta cualifica pa haci, of e no ta den condicion fisico y e kier hacie toch, e cos ta sali malo pe.
Pero un hende cu ta insisti den capricho, y cabesura cual ta hibe den inmoralidad ta un asunto mucho mas serio entre e persona y Dios.
Hopi biaha nos ta adverti pa medio di e palabra di Dios, y tin hende ta rebeldia contra Dios,bisando ami ta haci locual cu mi kier ta mi curpa, awel Romanos capitulo 2 vers 5 ta para scirbi:
Ma pa motibo di bo capricho y bo curazon cu no ta arepenti bo ta montona furia di Dios pa bo mes,den e dia di furia y revelacion di e huicio hustu di Dios kende lo paga cada ken segun su obranan.
Ta reina un silencio, pero nos tur ta mira cu maldad ta avansando, cu tur sorto di bagamunderia ta tuma lugar, y cu e malicia ey a crusa nos frontera y ta wordo consenti , pasobra libertad a bira libertinahe .Nos tin di haci oracion pasobra pronto e leynan ey lo wordo aproba serca nos tambe, pasobra hende no ta worry ora furia di Dios ta wordo lanta, ya cu nan ta asina diep den inmoralidad, pasobra diabel tin nan mal gaña.
Tin un spirito di rebeldia y tribilidad contra e Palabra , mandamento y principionan a lanta cu un hende cu tin temor di Dios no por compronde tal barbaridad. Esaki tin hopi famia preocupa.
Un no tin nada mas peligroso cu ora bo ta haci pica/maldad boluntariamente.
Adam y Eva a peca boluntariamente y a wordo saca for di paraiso.
Rey David aunke e a wordo spierta cu Betsabe tabata casa di Urias toch e a peca boluntariamente, y tur hende sa con leu e consecuencia di su pica a yega.
Pueblo di Sodoma y Gomorra a peca boluntariamente y a wordo destrui.( Aunke Abraham a intercede pa nan.)
Si bo ta rebelde contra Dios su mandamentonan Dios su man lo ta contra bo.(1 Samuel 12:15)
Pa motibo di rebeldia Rey Saul a perde su reinado ( 1Samuel 15:10+11).
Pa motibo di rebeldia lucifer a wordo saca for di cielo ( Ezekiel 28:15-18 y Isaias 14:12-15).
Pa motibo di rebeldia Moises no a wordo permiti pa drenta e tera priminti( Number 27:14).
Tur esakinan ta ehempel di peca boluntario y rebeldia contra Dios su Palabra.
A bin sali na cla cu hende no ta contento mas di forma cu Dios a traha nan, pasobra Dios a traha tur hende segun Su imagen y semehansa,Dios a crea homber y muher. ( Genesis 1:26+27+28).
Awor hende kier haci operacion y cambia nan sexo of curpa of genero of locual nan kier yame.
Nos tin masha respet pa tur hende, pero bijbel ta bisa cu nos curpa ta tempel di Dios.
Dios ta avisa hopi serio contra esnan cu kier haci cambio na nan curpa bisando:
1 Corintionan 3:16-17: Boso no sa cu boso ta e tempel di Dios, y cu e Spirito di Dios ta biba den boso,Si un hende destrui e tempel di Dios, Dios lo destrui e, pasobra e tempel di Dios ta santo, y esey ta loke boso ta.
1 Corintionan 6 :19+20 ta para scirbi: Of boso no sa cu boso curpa ta e tempel di Spirito Santo. Kende ta den boso, kende boso tin di Dios y boso no ta pertenece na boso mes.
Si den pasado tur esnan cu a rebeldia y a peca boluntariamente mester a sufri e consecuensia durante cu nan ta na bida, y awor aki e Palabra di Dios ta siña cu esnan cu no arepenti ta wordo condena na morto eterno .Un pregunta ta keda kico hende ta bezig cune?