Frakshon di Partido Nashonal di Pueblo (PNP) ta tuma nota ku preokupashon i ta kondená fuertemente e atakenan, informashon falsu i e intento di intimidashon di parti di Minister Charles Cooper dirigí na nos miembro di Frakshon, señor Elvin Gerard. Frakshon di PNP ta para firmemente i sin tambalea tras di sr. Gerard den su lucha hustu pa e derechonan di nos siudadanonan.
E dianan aki, nos ta sinti bon kla kon e kaya ta kayente i nos sa ku pueblo ta kansá di warda. Tin un krísis real na Domeinbeheer ku ta afektando miles di yu di Kòrsou ku tin aña ta warda riba un kontesta òf un tereno pa por konstruí nan futuro, mientras ta broma ku ta repartí pèrmitnan pa konstrukshon pa otronan.
Gerard semper a boga i tuma e kurashi pa trese e bos di e pueblo akí paden i pafó di Parlamento, eksigiendo transparensia i akshon rápido. E realidat doloroso akí no ta un invento, e ta keda konfirmá diariamente dor di e krítika severo di siudadanonan kontra e retraso inaseptabel, manera tambe a keda reportá resientemente den medionan di komunikashon lokal.
En bes di atendé e problema na su rais, duna kara na e pueblo i bini ku solushon pa e inefisiensia króniko na VVRP i Domeinbeheer, MFK ta opta manera ta nan modus operandis pa uza táktikanan di intimidashon i plama informashon inkorekto pa purba silensiá e trabou di kòntròl. Esaki ta algu ku ta keda kompletamente inaseptabel den nos demokrasia.
Frakshon di PNP no ta laga niun mandatario desviá atenshon for di su fayonan di maneho ku ela primintí di hasi kambio na dje dor di ataká esun ku ta eksigí hustisia pa e yu di tera.
Nos lema komo frakshon ta kla: “Kontrolá. Proponé. Mehorá.”
Sr. Gerard ta hasiendo netamente esei. E interes di e siudadano ku ke progresá mester prevalesé riba ego polítiko i show di poder.
Frakshon di PNP no ta hasi wega, ni nos no ta laga niun hende intimidá nos pa stòp nos di hasi nos trabou.
E meta mester keda semper mas importante ku kualke bataya personal: pues sirbi e hende.
Nos ta urgí Minister di VVRP/FIN pa stòp ku e atakenan personal den su funshon i pa kuminsá enfoká su energia i tempu riba drecha entre otro e desaster na Domeinbeheer. Te na e dia ku kada yu di Kòrsou haña e trato hustu ku e meresé konforme lei, Elvin Gerard i henter Frakshon di PNP lo sigui eksigí kontesta i kòntròl skèrpi.
Kòrsou i su hendenan ta na promé lugá. Nos ta keda vigilá e proseso aki di aserka i lo no deskansá te ora ku tin solushon fásil i palpabel pa e pueblo.
