Durante un presentacion recente bou di e fraccion di PPA, sra. Suzette Dumfries ta un Economist. Nation Builder, Change Agent. Philanthropist fundado di e empresa di conseho global dedica na e arkitectura di identidad nacional moderno y e desaroyo di nacionnan resiliente,a comparti un analisis profundo y visionario enfoca riba e futuro di San Nicolaas y e desaroyo general di pais Aruba. E presentacion a trece dilanti e conclusionnan di un investigacion extensivo conoci como e “Plan Dumfries 2030”.
E evento a keda describi como altamente positivo, unda e auditorio presente a keda sumamente satisfecho cu e presentacion structura, e resultadonan di investigacion, y e metanan proyecta pa futuro.
Investigacion y Planificacion Nacional
E nucleo di e presentacion tabata ta e analisis di e “Formando e Futuro di San Nicolaas”, unda a mustra e necesidad di convini tur entidad necesario pa logra un progreso real. Segun sra. Dumfries kende su filosofia ta basa riba e principio cu crecemento no nifica nada si e laga hende afo (Inclusive Outcomes) e investigacion a keda encarga pa traha den seis seccion separa, resultando den un plan cu ta abarca no solamente un area, pero cu ta keda priminti pa wordo carga como un plan nacional.
E meta principal ta pa e proyecto aki cuminsa carga sosten dor di diferente instancia, gobierno, y fraccionnan den e pais, transformando esaki den un iniciativa inclusivo pa henter e comunidad.
Construccion Colectivo y Decisionnan Husto
Un di e mensahenan central cu a resona profundamente ta e yamada na accion pa tur instancia gubernamental, lider, y ciudadano uni hunto pa construi e futuro. E anhelo ta pa empodera e hefenan y e comunidad cu ta biba y traha den e pais, otorgando e privilegio y e responsabilidad di tuma decisionnan basa riba datonan corecto, comprension profundo, y perspectivanan husto.
E iniciativa ta marca un paso importante pa garantisa cu e desaroyo economico y social di San Nicolaas y Aruba ta tuma luga riba un base solido y duradero, dunando atencion na e rol cu cada ciudadano tin como un berdadero “nation builder” pa e futuro di nos isla.