Ultimo temponan den medionan social ta tumando luga hopi discusionnan riba e tema entre sindicato y Gobierno cual ta polarisa nos comunidad. Hopi expresion, palabra di critica y ofensa ta wordo lansa riba nos empleadonan publico. Especialmente nos grupo di maestro/a y docentenan. Prome Minister Evelyn Wever-Croes a duna di conoce cu esaki ta hopi lamentabel y a expresa e importancia pa reflexiona riba e trato y respet pa otro.
Prome Minister ta haci un apelacion na nos comunidad pa tur hunto para keto un rato y realisa e trabou importante cu nos empleadonan publico ta haciendo, especialmente nos docentenan. Mama y tata di famia cu ta lanta tur mainta bay scol pa educa y duna enseñansa na nos yiunan. Pa yuda nos yiunan pa nan por ta un miho version di nan mes. Nos docentenan, maestro y nos maestranan ta duna alma y cuerpo pa nos yiunan y semper nan a hacie na un forma cu nos tabata hopi orguyoso di nan.
“Ban mustra nos aprecio na nos docentenan, nos maestro y maestranan. Nan ta bringando pa un derecho cu nan tin y tur hende tin dereho pa bringa pa su derecho. Na e momentonan aki, si nos mustra mas comprension y mas empatia, ta sigur cu lo yega mas leu”, Prome Minister a enfatisa.
Prome Minister a duna di concoe cu Gobierno ta compronde e preocupacion di mayornan tambe tocante kico lo bay pasa cu e yiunan si orario di scol bira menos y si docentenan no bay traha. Sinembargo, polarisa, falta respet, critica, zundra, expresa odio, expresa frustracion no ta bay yuda ningun hende.
“Laga nos respeta otro, laga nos respeta e posicion di docentenan, maestra y maestronan cu ta luchando pa un derecho cu nan tin. Laga nos mustra tambe respet pa e posicion di mayornan y bienestar di nan yiunan. Laga nos mustra respet na nos sindicalistanan cu ta haciendo loke nan tin cu haci pa nan miembronan y ban mustra respet pa Gobierno cu tin cu percura pa interes general di nos tur”.
Concluyendo Prome Minister a expresa y recorda un y tur cu na e momentonan aki Aruba ta den etapa di recuperacion. Aruba a pasa den temporadanan hopi dificil. Omicron a dal nos mas duro cu tabata pensa. Aruba mester di nos tur na e momentonan aki pa nos reconstrue y fortifica nos economia y pa asina nos hiba nos Pais dilanti. Aruba ta conta cu bo!