Accion di Bario a tuma luga un biaha mas, e biaha aki den bario Mabon. E iniciativa a conta cu un acogida positivo di e habitantenan, cu a haya oportunidad pa papia directamente cu Prome Minister Mike Eman tocante nan preocupacion, necesidadnan y ideanan pa mehora nan bario.
Durante e bishita, Prome Minister mr. Mike Eman a drenta bario hunto cu representantenan di diferente departamento y servicio publico, entre otro Serlimar, Bureau City Inspector (BCI), Polis di Bario (KPA) y GKMB, acompaña pa otro miembronan di su team ministerial. Parlamentario Otami Thomasia y Sonaly Fernandez-Acosta, representante di Ministerio di Turismo, Transporte y Labor, tambe a participa na e recorido. Representantenan di Fundacion Luna y miembronan di Comision di Desaroyo y Bienestar Bario Mabon tabata presente igualmente y a brinda nan aporte durante e bishita. E colaboracion entre tur e entidadnan aki a enfatisa e importancia di traha hunto cu comunidad pa identifica necesidadnan y busca e solucionnan concreto pa bario.
Na cada parada durante e recorido, Prome Minister mr. Mike Eman a tuma tempo pa scucha e habitantenan, conoce nan preocupacion, contesta nan preguntanan y dialoga tocante e necesidadnan cu ta biba den comunidad. E recorrido a inclui bishitanan na Caya Butishi, Caya Mangasina, Caya Bohi y Caya Parapete. Mientrastanto, e ploegnan di Bureau City Inspector y Serlimar a pasa den henter bario Mabon pa recoge diferente sushi cu e habitantenan a saca pa benta afo. E esfuerso conhunto aki a contribui na un ambiente mas limpi, ordena y agradabel pa tur habitante. Accion di Bario tin como meta recupera cada bario, mantene medio ambiente limpi y sigui traha hunto cu comunidad pa identifica prioridadnan y desaroya solucionnan practico cu ta beneficia tur habitante.
Ban haci nos barionan limpi
Como continuacion di e esfuerso aki, Gobierno ta invita tur habitante di Mabon pa participa activamente na Dia Nacional pa Cuida Aruba, cu lo tuma luga riba diasabra 25 di juli. E dia aki lo ta dedica na un esfuerso nacional di limpiesa, durante cual henter Aruba ta wordo invita pa uni y contribui na cuido y limpiesa di nos isla. Lo tin diferente baki rond na varios punto rond Aruba pa facilita coleccion di desperdicio.
Na Mabon tambe lo tin un baki disponibel, pa asina e habitantenan por sigui cu limpiesa di bario y completa e trabounan cu ainda ta pendiente. Ademas, tur habitante ta wordo invita pa reuni pa 8 or di mainta na e parke banda di e veld di bala. Hunto, comunidad lo limpia e parke y prepara e tereno pa e futuro plan cu tin den tapara pa e area.
Gobierno tin como meta pa crea un espacio bunita, limpi y funcional, unda tur habitante di Mabon por reuni y disfruta. Hunto nos por logra cosnan grandi pa nos propio bario. Cuida Aruba ta cuminsa cu cuida nos comunidad. Gobierno ta gradici tur habitante di Mabon pa nan cooperacion, participacion y compromiso.
