Awe directornan di Radio emisornan di Aruba a reuni cu Minister Geoffrey Wever di asuntonan di Telecomunicacion y Economia pa asina presenta nan obhecion contra di e intencion di Abogado David Kock y Ducapro/Buma Stemra di kier cobra radio emisorananan pa toka musica, e asina yama Royalties pa creadornan di musica.
Radio Emisoranan a duna un splicacion na Minister Wever cu desde introduccion di Internet; Youtube y tur otro medio musical y social, emisoranan a sufri golpinan masha duro den cantidad di audiencia y nan entrada. Pa hopi radio emisora, mas gasto di operacion kiermen sla mortal. David Kock a laga sa cu e ta representa Ducapro y Buma Stemra di Hulanda kendenan lo ta esnan cu lo ricibi e entradadan cu lo wordo cobra pa despues reparti pa e artistanan. Pero ta bon pa menciona cu unabes cuminsa cobra e Radio emisoranan, tur otro negoshi cu ta toca musica pa anima of background music tambe mester bay paga, manera un Café, Bar, Restaurant, DJ. Nightlclub y tambe na actividadnan Deportivo of social. Nan lo mester haya licencia y paga Ducapro-Buma Stemra entrante 1 di Januari 2024.
Pues na un manera abrupto y cu hasta menasa di tuma pasonan na interes di e instancianan concerni a manda carta pa doñonan di Radio. Gerentenan di emisoranan a pidi e Ministro di Telecomunicacion pa considera e argumentonan presenta durante di e reunion pa asina por interveni y yega na un solucion cu ta na bienestar di emisornan y tur otro instancia cu ta uza music na Aruba. Radio emisornan ta respeta derechonan di autor y artistanan, sinembargo Radio emisoranan ta di opinion cu esaki no ta e manera pa impone un gasto nobo pa e emisoranan of otro instancianan. Presente tawata Srs Omar Steve Lejuez di Heart 106.7 – Johny Habibe Hit 94 & 88.1- Aldrich Croes di Hits 100.9- Juan Carlos Sonri di Caliente 90.7 – Farah Boekhoudt di Vybz 103.5 – Wouter Gesterkamp di 97.5 Easy FM – DJ Korsou tambe pa 107.5 – y Erin Croes Magic 96.5 FM.