Un trayectoria cu ta destaca e union poderoso entre potret, historia y comunidad na Aruba.
E proyecto fotografico y cultural conoci como “Lens di mi Wowonan” a yega na su di 18 aniversario, un punto importante cu ta bolbe confirma su balor como un punto di encuentro crucial pa fotografonan, periodistanan y comunidad en general.
Pa dos decada largo, e plataforma aki a sirbi como e vehiculo pa comparti e historianan mas profundo conta door di e lens. E edicion aki ta trece hunto arte, identidad y e testimonio bibo di nos pais, dunando espacio na esnan cu ta documenta e bida constante y historico di nos isla.
Durante e conferencia di prensa oficial, director di RBC Royal Bank, Pierre Rafini, a comparti su gratitud y orguyo pa cu e trayectoria aki. El a subraya e compromiso constante di e entidad bancario cu e bunita iniciativa aki.
“Ta un honor pa nos den RBC contrbui na celebrando e 18 aña di ‘Lens di mi Wowonan’. Durante 18 aña, e exposicion aki a reuni fotografonan, periodistanan y comunidad en general pa celebra e historia nan conta door di e lens. Y durante cada un di e di 18 añanan ey, RBC Royal Bank Aruba NV a sinti su mes orguyoso di acompaña e iniciativa aki como su patrocinado principal.”
Rafini a remarca cu e colaboracion aki ta refleha un compromiso profundo cu arte, cultura y cu e personanan cu ta dedica nan bida na documenta e realidad di Aruba.
E aña aki, e exposicion ta dedica na Departamento di Cultura Aruba (DCA) den ocasion di su 48 aniversario. E reconocimento aki ta yena e celebracion cu un significante ainda mas profundo, considerando e trayectorio largo di DCA.
Durante casi cinco decada, DCA a traha incansablemente pa conserva, documenta y promove nos patrimonionan cultural. E trabou aki ta duna un peso historico extra na e edicion di e aña aki, un temporada unda Aruba tambe ta conmemora:
• 70 aña di nos Escudo Nacional.
• 50 aña di nos Himno y Bandera.
• 40 aña di nos Status Aparte.
Pesey mes, e edicion aki ta den hopi sentido un homenahe na identidad mes, na ken nos ta, y na e institucionnan y simbolonan cu ta uni nos como un solo pueblo.
Den su mensahe, director di RBC a enfatisa e meta comun cu e banco tin cu su clientenan y e comunidad Arubano en general: “Na RBC, nos proposito ta pa yuda nos clientenan prospera, crece, y nos comunidadnan prospera. Un comunidad ta prospera ora cu su cultura ta wordo mira, aprecia y conserva.”
E celebracion di e 18 aña di “Lens di mi Wowonan” ta keda demostra cu ora e sector priva, instancianan gubernamental y e artistanan uni forsa, e historia di nos pais ta keda na bida pa e generacionnan di awor y di mañan