Richard Kramers no ta un persona desconoci den nos comunidad. Despues cu tabata director di Guarda nos Costa GNC pa basta tempo y a haya su mes den un problema cu a bay para te den corte y a gana tur su casonan, awe Richard Kramers ta fungi como hefe di Cuerpo Especial Arubano CEA. E luna di september ta un luna special pa Kramers debi cu prome di september 2024 ta e dia cu a cuminsa cu e trabounan na CEA.
Cu hopi amor y atencion a cuminsa na e departamento cu ta encarga cu siguridad y proteccion di edificionan di gobierno, corte , KIA , celnan di polis, transporte di detenidonan, ministerio publico, directie luchtvaart, voogdijraad, reclasering y servicio di impuesto. E departamento ta uno basta grandi cu tin hopi responsabilidad.
Na yegada di Richard Kramers CEA a trata di modernisa e dienst y reorganisa algun puntonan cu tabata falta cu tabatin mester di nan atencion. Na mes momento a cuminsa cu varios curso pa e trahadonan,training, opleiding, les di Hulandes , cursonan di beveiling , EHBO, tiro , con pa maneha den situacionnan cu ta peligroso.
Den e 1 aña cu a tuma CEA over tin varios puntonan positivo cu a pasa entre otro a regla posicion huridico di varios trahado, tambe a trece uniform nobo pa CEA.
Sinembargo e trabounan no a caba ainda , lo mester regla e parti di transporte di detenido mirando cu e vehiculo cu CEA tin na e momentonan aki ta duna un poco di dolor di cabes , pero hunto cu ministerio di Husticia ta trahando pa trece vehiculonan nobo y denter di poco lo mustra y anuncia esakinan di kico ta e cambionan cu ta bay tin den e parti di transporte.
Tambe tin bon comunicacion cu sindicato y te na e momentonan aki e trahadonan di CEA ta contento cu e cambionan cu tin y cu falta pa bin. Tur e cambionan menciona ta cambionan cu a haci den un aña di tempo y importante ta cu e trahadonan ta habri pa cambio y ta contento cu e desaroyonan nobo cu tin.
CEA mes tin un tempo basta largo sin un persona na cabes di e departamento, e persona cu tabata na cabes tabata pa un tempo basta largo malo di salud y esaki a pone cu pa basta tempo no tabatin un guia den e departamento. Sinembargo por bisa cu a bin haya e departamento den un bon estado unda cu e fundeshi tabata bon pero cu mester a haci algun ahuste pa modernisa, pero den su totalidad e departamento tabata den bon man.
Loke cu a hunga un rol grandi ta e parti di atencion na e personal y pesey mes na momento cu a drenta e personal a haya e atencion aki tambe. Tambe a inculca deporte pa asina trece motivacion den e trahadonan unda cu a participa den torneonan di softball partinan cu hopi tempo no tabata tuma luga. Tambe a traha riba momentonan cu e personal por bini hunto y e cambionan aki ta nota mesora cu den e area di trabou ta reina un situacion di satisfaccion.
Banda di tur cos loke cu ta un realidad ta cu CEA ta hopi corto na personal, pero ta tratando hunto cu minister di husticia pa wak con por bay recluta personal pa bay CEA y e intencion ta den futuro pa organisa opleidingnan pa asina esnan cu ta bay cuminsa den CEA por cumpli cu un opleiding di CEA prome cu e bay den servicio. Na e momentonan aki CEA ta 85 % di persona nan cu ta ex arumil cu ta personanan cu ta bin cu un base caba riba e tereno di siguridad y disciplina. Sinembargo e plan pa futuro ta pa CEA tin opleiding di CEA cu e personanan cu ta wordo recluta ta pasa den full un sistema di training prome cu e cuminsa cu su trabou.
Pa Richard Kramers un aña a pasa relativamente lihe y a bay hopi bon compara si mester wak un rato atras tog ta un bon escogencia di a bin traha na CEA. Un departamento den un bon nivel y riba e prome dia di trabou a haya un caluroso bon bini for di e trahadonan.
