Fundashon Bonaire Human Rights Organization (BHRO) ta haci un yamada urgente di SOS na comunidad internacional. Boneiro ta enfrentando un crisis humanitario y demografico silencioso cu ta menasa e sobrevivencia di e pueblo nativo boneriano riba largo plaso.
Na 2004, Ramonsito Booi di UPB, e partido politico principal di Boneiro, hunto cu Burney Elhage, Arthur Sealy, James Kroon, Jopie Abraham y otro lidernan politico, tabata entre e arkitectonan principal y personanan responsabel pa e proceso constitucional cu a desmonta Antias Hulandes. Sin e consentimento di su pueblo, nan a degrada Boneiro na un status constitucional nobo y subordiná como “entidad publico”, administra y goberna for di Den Haag. Den e tempo ey, Boneiro tabatin un poblacion di aproximadamente 10.008 habitante, mayoria di nan bonerianonan nativo.
Na 2017, Clark Abraham di Partido Democratico (DP), hunto cu MPB, Elvis Sjin Asjoe y Daisy Coffie, a aproba den Conseho Insular pa Hulanda ancla Boneiro den Constitucion Hulandes, sin e boluntad liberamente expresa di e pueblo.
Pa 1 di januari 2026, poblacion di Boneiro tabata 27.611 habitante, cu e crecemento reciente di e poblacion impulsa pa gran mayoria pa inmigracion. Den 2025, Boneiro a registra solamente 252 nacemento, 170 fayecemento y 2.116 inmigrante, demostrando cu inmigracion, y no crecemento natural di e poblacion, ta e motor principal di e aumento poblacional riba e isla.
E cifranan aki ta bin for di Centraal Bureau voor de Statistiek (CBS), e autoridad nacional independiente di estadistica di Hulanda, responsabel pa colecta, analisa y publica e cifranan oficial demografico, social y economico di e pais. Segun e pronostico oficial di poblacion pa Caribe Hulandes (2025–2050) di CBS, poblacion di Boneiro lo sigui crece di 26.600 na 2025 te cu aproximadamente 34.200 na 2035.
CBS ta proyecta tambe cu e porcentahe di habitantenan naci na Boneiro lo sigui baha, debi cu inmigracion lo keda e fuente principal di crecemento di poblacion. Segun e proyeccionnan demografico oficial aki, si e tendencianan actual continua, bonerianonan nativo por bira menos cu 15% di e poblacion di Boneiro den e proximo diez aña, transformando e pueblo nativo den un minoría den nan mes tera natal.
Tin hopi otro factornan institucional cu ta contribui na e destabilisacion y eliminacion demografico y cultural aki, manera e bahada di tasa di nacemento entre bonerianonan nativo, aumento di mortalidat, y e situacion economico cu a bira mas dificil despues di e kambionan constitucional di 10 di oktober 2010.
Ademas, e aumento di impuesto riba tereno y propiedad, e subida enorme di prijs di cas, e aumento di costo di bida y e presion financiero creciente a obliga hopi bonerianonan nativo pa bende nan terenonan ancestral, cas di famia y negoshinan local, of pa bandona Boneiro completamente pa busca oportunidadnan mas accesibel den otro pais.
Tur e presionnan aki, combina cu e continuo inmigracion, ta acelerando e eroshon demografico y cultural di e pueblo nativo boneriano.
Pa e motibo aki, BHRO ta haci un yamada urgente di SOS na CARICOM, COPPPAL, e Organization of Eastern Caribbean States (OECS), e Organization of American States (OAS), Nacionnan Uni, e Conseho di Derechonan Humano di Nacionnan Uni, gobiernonan den henter Caribe y America Latino, organisacionnan internacional di derechonan humano, sociedad civil y tur hende di bon boluntad, pa examina cu urgencia e situacion na Boneiro y tuma accionnan apropiá pa yuda proteha e derechonan humano fundamental, identidad, cultura, idioma, herencia y futuro di e pueblo nativo boneriano prome cu e crisis humanitario silencioso aki bira irreversibel.
Bonaire Human Rights Organization