Tin ora na Den Haag nan sa lubidá ku Boneiru, Sint Eustatius i Saba ta forma parti di Hulanda komo munisipionan spesial, pero Asosashon di Munisipionan Hulandes ta duna nos e sintimentu ku di bèrdat nan ta aseptá nos komo tal’, segun gezaghèber Edison Rijna.
Huntu ku presidente di Asosashon di Munisipionan Hulandes i alabes burgemeester di Den Haag Jan van Zanen, Rijna a wak bèk riba e Kongreso Anual kaminda via un livestream el a konta e burgemeester- i wethoudernan tokante kon Boneiru ta superando e krísis di corona i enfoká riba sostenibilisashon.
‘E koperashon ku Asosashon di Munisipionan Hulandes ta kana hopi plasentero. Nos por hasi uso di un tesoro na konosementu i eksperensia ku Asosashon di Munisipionan Hulandes tin riba tereno di gobernashon lokal i kon pa anda ku por ehèmpel ministerionan. Ku gratitut nos ta hasi uso tambe di e disposishon pa adaptá nan kursonan i treinennan na nos sirkunstansianan’, segun gezaghèber Rijna.
‘Naturalmente nos a papia tambe tokante kiko nos komo tata di pueblo por topa kuné diariamente den nos trabou. Ta un gezaghèber so tin na Boneiru, p’esei personalmente pa mi ta hopi agradabel pa de bes en kuando por interkambiá di idea ku un kolega. Pa e motibu akí mi ta ansioso pa bishitá e siguiente enkuentro di e asina yamá ‘klas di burgemeester’ na luna di sèptèmber’, segun Rijna.
1 comment