Alexandra van Huffelen, Sekretario di estado di Relashonnan den Reino i Digitalisashon, ta bishitá Sint Maarten di 11 pa 14 di yanüari pa partisipá na e ‘vierlanden overleg’. E reunion na nivel gubernamental ta entre Hulanda i e promé ministernan di e demas tres paisnan den reino: Aruba, Kòrsou i Sint Maarten i ta tuma lugá riba 12 i 13 di yanüari na Sint Maarten.
Durante di e reunion tin kuater tópiko riba agènda. E reformanan den sektor públiko na Aruba, Kòrsou i Sint Maarten, deliberashon tokante un ‘geschillenregeling’ pa reino, resolvé e falta demokrátiko i aksesibilidat di elekshonnan europeo. Finalmente ta papia tokante organisashon di e siguiente Konferensia di Reino.
Na e ‘vierlanden overleg’ anterior di yüni 2022, e kuater paisnan a palabrá ku Aruba, Kòrsou i Sint Maarten ta bin ku un proposishon pa palabrashonnan ku nos ke hasi ku otro tokante reformanan nesesario riba tereno di entre otro estado di derecho, finansa públiko i ekonomia. Ta e intenshon pa yega na akuerdonan durante di e ‘vierlanden overleg’ tokante mas kolaborashon den reino riba e punto aki.