Petishon pa Kòrsou uni den lucha pa derecho humano
Di parti di frakshon di MAN-PIN den Parlamento, nos a presentá un petishon ofisial na Minister-President sr. G. Pisas pa na nòmber di Kòrsou tuma un posishon fuerte i klá den e próksimo reubion di Konseho di Reino tokante e situashon preokupante i doloroso den Gaza. Nos tur ta mira diariamente e situashon inhumano na Gaza kaminda hasta mucha chikí ta muri di hamber i e pais ta kompletamente destrosá.
Kòrsou ku ta un di e kuater paisnan di Reino Hulandes , ta representá di un pueblo diverso ku tur grupo étniko, kultural i religioso ku semper a bibá den harmonia ku otro ku deseo pa pas i hustisia.
Mirando e situashon na Gaza, Reino Hulandes no por keda ketu i mantené silensio mientrastantu miles di mucha, adultonan mayó, hende muhé i hende hòmber ta sufrí pa motibu di un violensia desproposhonal i falta di kuminda i awa pa motibu ku Israël deliberadamente ta blokiá akseso na esakinan, mientras ku tin destrukshon di tur infrastruktura vital dor di atakénan Israëlí.
Frakshon MAN-PIN ta konvensí ku Kòrsou mester lanta su bos komo parti di Reino Hulandes i mustra gobiernu Hulandes ku Reino mester asumí su responsabilidat basá riba humanidat.
Diferente organisashon internashonal a kalifiká e situashon den Gaza komo un akto di genocidio. Resientemente munisipionan manera Amsterdam i Utrecht tambe a èkspresa nan preokupashon ku e posishon di Reino Hulandes pa ku e situashon inhumano na Gaza.
Nos ta hasi un yamada úrgente riba Minister-President Pisas pa representá e bos di Kòrsou den e reunión di Konseho di Reino pa èkspresá ku Israël mester stòp inmediato ku e agreshon, habri akseso pa asistensia humanitario, esta kuminda, awa i kuido mediko.
Nos pueblo ta kere den pas, den dignidat humano i den responsabilidat moral. Kòrsou ta un isla neutral, un pais ku konsenshi kaminda tur hende sea di desendensia Libanes of Palestino ta biba den konvinensia ku esnan di desendensia Hudiu. E ehèmpel aki nos isla a pone pa mundu kompleto.