Djasabra awor 6’or di atardi, nos muchanan di Boneiru lo tin e oportunidat pa mira
un obra teatral interaktivo pa henter famia. E ta bai tokante amistat, aventura, kompashon i e kurashi pa ta bo mes. Art Culture Education Foundation a presensiá e obra aki na Korsou i e ta sigur un obra ku ta bale la pena pa tur mucha i nan mayornan wak. Pa e motibu ei djasabra awor den un interkambio kultural ku nos muchanan di ACE Kids Club nos lo bai trese pa Boneiru dos den un. E obra “Mi Amigu Monsi” i den pre-show “ACE Kids Club” ku e obra “Shonnan bin tende un kuenta”. E obra teatral Monsi tin un total di 5 aktor i ta dirigí pa Richailine Elisa direktor di Elisa Academy. Elisa Academy ta un skol di teater na Kòrsou ku e último dos añanan ta hopi aktivo ku dunamentu di lès di teater i tambe produsí obranan teatral i tin un laso di kooperashon ku ACE Foundation.
“Mi amigu Monsi” ta un obra ku tin tur kos den dje e ta “spannend” i ala-bes kómiko. E tin te asta muzik den dje. Den pre-show nos muchanan di AE Kids Club di Boneiru lo bai presentá “Shonnan bin tende un kuenta” for di e seri di “Palu di Kuenta”. E biaha aki “Palu di Kuenta” lo konta di Kompa Nanzi ku a bira sapaté. Ta kiko Nanzi lo bai hasi atrobe? Manera boso sa Nanzi ta yen di astusia. Esaki ta un obra dirigí pa Lilimar Valencia ku baile i koreografia di Joeny Molina i kantikanan di ACE Kids Club skibí pa Segni Bernardina. E atardi di teater aki lo tuma lugá na Jong Bonaire pa 18:00 i karchi ta optenibel na Joshanty’s Multishop i tambe serka miembronan di ACE KIDS CLUB òf yama/whatsapp 790 0155 pa bo reservashon.