Durante e di 35th Annual Winter Championships 2025 (Short Course – yards), teni na Plantation, Fort Lauderdale, tabatin cuater dia intensivo di competencia. E competencia aki ta considera uno hopi importante den calendario di natacion regional, unda tin mas di 1200 landado participando for di diferente pais y club. E 7 atletanan cu a representa Stingray Swimming tabata: Xendrick de Man (16), Tyler Richards (16), Landon Laaf (22), Yeshua Maduro (15), D-Leylah Gerrel (14), Vitali Inocencia (12), Emma Ponson (12).
Preparacion y enfoke
Prome cu e apertura oficial di e campeonato (11 te 14 di December 2025), e landadonan di Stingray a beneficia di un sesion extra di entrenamento na Davie Pine Island Fitness & Aquatics Center, hunto cu Elite Coach di Team Azura Sr. Gustavo Rasia. E entrenamento aki tabata e preparacion final pa e transicion na short course yards, yudando nos atletanan ahusta tecnica, ritmo y enfoke mental prome cu e competencia. E grupo a yega Plantation Aquatic Complex sumamente motiva, mentalmente cla pa representa Aruba bou di e guia y liderazgo di Coach Paolo Inocencia.
Resumen di Competencia
Un total di 7 atleta a representa Stingray, cual ta ekivalente na 53 evento total landa. Esaki a resulta den 45 evento cu record personal (PB), cual ta 85% di record personal. Tin 4 atleta cu a
logra PB den tur nan eventonan y e landador femenino Vitali Inocencia a logra 3 medaya di plata. Durante e dianan di competencia un total di 7 biaha a bay den final y tabatin 1 atleta cu a logra di ta alternativo.
E estadisticanan aki ta mustra claramente e nivel di progreso, consistencia y madures competitivo di nos atletanan. Pa logra un porcentahe asina halto di record personal den un competencia, ta refleha cu e training ta duna resultado concreto.
Orguyo di Ekipo
Mas cu e medayannan, e mayor victoria tabata e actitud di ekipo: apoyo mutuo, disciplina, enfoke y determinacion. Cada salida den piscina tabata un refleho di e compromiso cu nos atleta ta hiba den nan desaroyo personal y deportivo.
Stingray Swimming Team ta sumamente orguyoso di tur su landadonan cu a representa Aruba na Plantation. E prestacion aki ta confirma cu nos ta riba e caminda corecto y cu e futuro di nos landamento ta den bon man. Nos ta desea tur landado hopi exito den nan proximo competencia, sigui pusha, sigui crece y sigui haci Aruba orguyoso.
