Reakshon riba VBC
Frakshon di MAN-PIN a tuma nota di e reakshon di asosashon di komèrsio i industria, VBC riba ponensianan di lider di frakshon di MAN-PIN Giselle Mc William, relashoná ku e ròl importante ku gruponan di interes ta hunga den demokrasia di pais.
Den esaki frakshon di MAN-PIN a mustra riba posishonnan krítiko no solamente di VBC, pero tambe sindikatonan, prensa i organisashonnan sivil a tuma den pasado riba maneho i desishonnan ku gobernashon ta tuma loke ta kontribuí na un demokrasia bibu di saludabel den pais. Algu ku MAN-PIN a sinti falta di dje último añanan.
Tabata a base di pregunta di prensa relashoná ku komentarionan di minister di Finansa riba retnan sosial en konekshon ku notisia internashonal rondó di un akshonista den un kompania di seguro lokal, ku Giselle Mc William lider di frakshon MAN-PIN a trese dilanti ku e komentarionan aki no ta aseptabel. Esaki sigur mirando kiko a pasa den pasado na entre otro ENNIA. E Konsekuensia ta ku pais mester paga 30 mion florin pa aña durante 30 aña. Ta den e kuadro aki MAN-PIN a trese dilanti ku ta sinta falta di organisashonnan manera VBC ku ta duna su opinion skèrpi riba asuntunan aki ku ta mishi ku nan miembronan. Esaki tin nada di aber ku polítika òf di ta un partido polítiko.
Algun ehèmpel di opinionnan skèrpi ku VBC ku regularidat tabata dilanti den pasado den esfera politiko :
na mart 2018 VBC a saka un karta den kua ta kritiká défisitnan presupuestario struktural, ta hasi yamada pa gobièrnu ekonomisá riba su gastunan i pa no tuma medida pa subi gastu pa sektor privá. Alabes a atvertí kontra instrukshon di Hulanda riba finansa di pais. Pa sita un frase for di e karta di VBC: “De overheid moet de tering naar de nering zetten in plaats van de private sector verder te belasten.”
Na aprel 2020 VBC a saka otro karta mei mei di e pandemia di Covid indikando ku e asosashon ta sostené medidanan di sosten temporal, pero ta enfatisá ku mester di reformanan struktural den pais. Tambe a atvertí pa kreashon di debe riba término largu i tabata di opinion ku gobièrnu a usa e krísis ekonómiko-finansiero okashoná pa Covid pa posponé reformanan.
Na ougùstùs 2020 VBC a saka otro komunikado bisando ku e asosashon ta desapuntá pa un falta di maneho ku ta stimulá invershon i a hasi un yamada pa reforma struktural den lei i regulashonnan pa invershonista. Den e mesun komunikado a kritiká e burokrasia i ku gobièrnu no ta tuma desishon ku e diligensia nesesario.
Djis promé ku elekshon na 2021 VBC ta saka un karta final pa gabinete Rhuggenaath ku un evaluashon general indikando ku tabata 4 aña di oportunidat pèrdí. VBC tabata fuerte kontra loke e ta haña ta ehekushon di reforma sin e dinamismo nesesario. Tambe tabata haña ku aparte ku a konsultá e asosashon na hopi okashon ku no tabata skucha loke nan trese dilanti. P’esei VBC a boga pa un kompas sosial-ekonómiko nobo.
Ta den e kuadro aki tambe ku frakshon di MAN-PIN a tres dilanti ku, apesar ku no ta tende nada di gobièrnu aktual, ku nan no ta tene konferensia di prensa, ku nan no ta konsulta ku gremionan sosial manera sindikatonan i representantenan di komèrsio, no ta tende un bos di protesta di ni prensa, ni sindikato, i ni VBC kontra e situashon aki.
MAN -PIN ta sigui aportá na demokrasia di nos pais i alabes enkurashá organisashonnan manera tabata kustumber sigui salbaguardia demokrasia i libertat di ekspreshon.