Na nomber di James Finies, Fundador di Bonaire Human Rights Organization (BHRO), nos ta orguyoso di anuncia e gran éxito di e tayer di derecho humano “Nos Tambe Tin Derecho”, cu a tuma luga diasabra, 22 di augustus 2026, na Biblioteca Publico Bonaire.
E tayer a alcansa su capacidad completo, cu participantenan di diferente nacionalidad, origen y cultura cu ta forma parti di e comunidad diverso di Bonaire. E cantidad grandi di participante ta un reflejo positivo di e interes creciente den comunidad na Bonaire pa siña tocante nan derechonan humano fundamental y con e derechonan ey ta aplica den bida diario.
Pa BHRO, e mensahe tabata cla: hende kier sa nan derechonan. Participantenan a ricibi un introduccion na e principionan fundamental di derecho humano y material di educacion, diseña pa yuda nan compronde miho nan propio derechonan y derechonan di otro. E diversidad di esnan cu a asisti tabata particularmente alentador y a demostra cu educacion tocante derecho humano ta relevante pa tur hende, sin importa nacionalidad, origen, idioma, edad of background.
BHRO a pone como meta pa educa 3.000 persona na Bonaire den derecho humano durante e proximo tres añanan. Esaki lo tuma luga mediante tayer, anochi di pelicula tocante derecho humano, sesion informativo den comunidad, actividad educativo y iniciativa pa crea conscientisacion publico rib’e isla completo.
Presidenta di BHRO, Davika Bissessar Shaw, a declara:
“Nos meta ta cla: educa 3.000 persona na Bonaire den e proximo 3 añanan mediante tayer di derecho humano, anochi di pelicula, sesion informativo den comunidad y otro actividad educativo. Nos kier pa educacion tocante derecho humano yega tur parti di nos comunidad. Hende mester conoce nan derechonan, compronde derechonan di otro y sinti nan empodera pa para firme pa dignidad humano.”
BHRO ta meentene su sincero gradicimento na direccion y personal di Biblioteca Publico Bonaire pa nan sosten y pa haci un espacio agradabel y accesibel di forma disponibel pa e tayer. Nos ta aprecia y valora masha hopi nos bon relacion di trabou.
BHRO kier expresa tambe su apreciacion sincero na United for Human Rights pa nan sosten continuo, recurso educativo y compromiso pa promove educacion tocante derecho humano. Nan sosten ta un parti importante di nos esfuerzonan pa hiba conocemento tocante derecho humano directamente pa e pueblo di Bonaire.
Un danki di curason ta bay tambe pa nos boluntarionan dedica: Embahador di BHRO Phenice Frans-Piar, Embahador di BHRO Joseline Thielman, Capitan Tulsie Bissessar, Gario Frans di BHRO Youth 4 Rights, Omar Janga y Marjolein Finies. Nan tempo, energia y sosten a yuda haci e tayer aki un gran éxito.
Bonaire Human Rights Organization (BHRO) Dignidad • Igualdad • No-Discriminacion