M21, e diferensia
For di 4 pa 6 di mart 2024 un delegashon di Boneiru tabata na Hulanda den kuadro di negosiashon di kambio den WolBES i FinBES. A presentá di parti di Boneiru 2 lista. Un lista huntu ku e tres islanan Boneiru, St. Eustatius i Saba huntu i un lista ku diferente punto di Boneiru so. E lista di e 3 islanan tabatin 17 punto. Di e 17 puntonan akí 14 a keda aseptá kompletamente, 2 a yega na un kompromiso i 1 mester keda konsiderá mas profundo di parti di Raad van State. E lista di Boneiru so tabata konsistí di un total di 13 punto, di kua 11 a keda aseptá kompletamente, 1 a yega na un kompromiso i tin 1 ku mester keda konsiderá mas profundo di parti di Raad van State. Ku otro palabra, un éksito di 83% pa Boneiru i 93% pa tur e islanan huntu!
Perspektiva
Aparte di e éksito menshoná, ta bon pa pone e resultado aki den e konteksto o sea perspektiva korekto. E kambio di WolBES i FinBES akí ta den tapara pa mas ku 3 aña kaba. E Kolegio Ehekutivo anterior no a hasi kaso i den pitu a kore manda un karta kaminda nan kier a bai di akuerdo ku meramente 3 punto ku tabata: kambio di e kantidat di miembro di Konseho Insular, kambio di e kantidat di diputado i anulá e funshon di Representante di Reino (Rijksvertegenwoordiger). Esaki tabata sin konosementu di Konseho Insular, pa no papia mes di konosementu di pueblo. Ta te ora ku Hulanda kier a trese un konklushon na e proseso i a envolví Konseho Insular den esaki, ku Konseho Insular a bin haña sa di un karta ku a manda ku deseonan di e Kolegio Ehekutivo anterior. Akinan e Konseho Insular aktual a para e proseso i a entregá un petishon pa nan duna nan aporte komo representante di pueblo. Asina nos a yega kaminda nos ta awor akí. Porfin a duna representantenan di pueblo oportunidat pa partisipá den e proseso. Ku otro palabra: nan tabata kier a kambia WolBES i FinBES sin konosementu di Konseho Insular i sin konosementu di pueblo. Ku esaki nos por bisa ku un era di “ja meneer” a yega na su fin.
Elogio pa nos lider
Sin ke kita for di kontribushon di otronan, nos di M21 ta felisitá nos lider Daisy Coffie ku e trabou ku el a desplegá komo lider di delegashon di Boneiru i esun ku na Hulanda a hiba palabra na nòmber di Boneiru. Nos ta sumamente satisfecho i nos a biba ku nos lider i nos sa di e trabou ku ela hasi, no solamente komo representante di pueblo òf bosero di e delegashon di Boneiru, pero tambe komo intermediadó pa tene e gruponan i islanan huntu i esaki den un ambiente agradabel pa por a traha ku otro i yega na un bon resultado pa tur e islanan. Nos ta gradisí Daisy Coffie, tur e otro miembronan di Konseho Insular, e miembronan di Kolegio Ehekutivo, tur e konseheronan i tur otro persona pa nan kontribushon na e logro akí pa Boneiru.
Amigu i enemigu por bisa kiko ku nan ke, pero e logro akí ta un logro grandi. Prinsipalmente e echo ku porfin no a kore bai na amèn di Hulanda pa falta di kompromiso ku nos pueblo òf pa simplemente flohera i/òf inkapasidat pa sali na vanguardia di pueblo. Di awor padilanti Hulanda tin ku tene kuenta ku e tempu di “ja meneer”, e tempu di “ja knikkers” a pasa i ku tin hende kapas ku ta dispuesto pa sali na vanguardia di pueblo.