Cu hopi orguyo Tourism Corporation Bonaire (TCB) ta celebra su di 35 aniversario, y asina ta marca mas cu tres decada di dedicacion sostenendo desaroyo duradero di turismo na Boneiru. For di su lanta na aña 1991, TCB a traha estrechamente hunto cu gobierno, sector priva, organisacionnan social y partnernan local y internacional pa yuda posiciona Boneiru como un di e destinacionnan mas aprecia y distingui den area caribense.
Durante e 35 añanan tras di lomba, e sector turistico di Boneiru a conoce un desaroyo significante. E cantidad di bishitante a aumenta, tabatin ampliacion di conexionnan internacional, e oferta turistico a diversifica y nos isla a haya reconocemento mundial pa su ambiente marino birgen, su posibilidadnan excepcional pa buceo y deporte acuatico, su cultura autentico y su compromiso cu conservacion di naturalesa. E progreso aki nunca no tabata logro di un solo organisacion, sino resultado di un vision comparti y e esfuersonan conhunto di henter comunidad di nos isla.
Mientrastanto cu mercadeo di destinacion semper tabata un componente nucleo di TCB su mision, e organisacion a crece y bira un organisacion di maneho di destinacion cu ta enfoca tambe riba investigacion y dato, planificacion strategico, desaroyo di producto, desaroyo di conexion aereo y crusero, sostenibilidad, enbolbimento di nos comunidad local y colaboracion dentro di e sector. Tur e esfuersonan aki hunto ta yuda garantisa cu turismo ta sigui crea balor permanente pa habitantenan, empresanan y bishitantenan di Boneiru.
Durante su existencia, TCB tabatin e privilegio pa traha hunto cu un ret amplio di partner, incluyendo empresarionan local, proveedornan di acomodacion, restaurantnan, centronan di buceo, empresanan di deporte acuatico, operadornan di tour, empresanan di transporte, comerciantenan pa menor, companianan di aviacion, companianan crusero, Bonaire International Airport, partnernan di haf crusero, conseheronan di biahe, destinacionnan, medionan di comunicacion, gobierno, institucionnan di enseñansa, investigadornan, organisacionnan di naturalesa y cultura, agrupacionnan social y partnernan di destinacion atraves di henter mundo. E colaboracionnan aki a hunga un rol crucial den caso di fortificacion di e sector turistico di Boneiru y di engrandecemento di e reputacion internacional di nos isla.
Banda di esaki, orguyosamente TCB a sostene, desaroya y promove numeroso evento, iniciativa y campaña cu ta celebra Boneiru su identidad y fortifica su oferta turistico. For di eventonan prominente manera Regata di Boneiru y Dia di Rincon, te iniciativanan di comunidad, celebracionnan cultural y campañanan internacional di promocion: e esfuersonan aki a contribui na popularidad di nos isla y na mes momento nan a crea oportunidad pa tantu nos habitantenan, nos bishitantenan y nos empresanan local.
Mientrastanto cu TCB ta wak bek riba e logro aki, nos ta duna honor tambe na e hopi hendenan cu durante e 35 añanan tras di lomba a dedica nan pasion, nan experticio y nan liderazgo na e organisacion. E organisacion ta expresa su sincero apreso pa su fundadonan y pioneronan, pa e anterior y e actual miembronan di Hunta di Supervision, miembronan di directiva, comisarionan, anterior directornan y timnan di maneho, y tambe cada empleado, tantu di den pasado como den presente, kende nan dedicacion a contribui na dunamento di forma na TCB pa bira e organisacion cu e ta awe. Nan esfuersonan conhunto a pone e base pa un sector turistico resiliente y cu enfoque riba futuro.
“Na prome luga e aniversario aki ta un celebracion di nos isla y di tur hende cu a contribui na desaroyo di turismo na Boneiru,” segun Elesiër Angel, director di TCB. “Turismo ta basa riba colaboracion, responsabilidad comparti y un vision comun pa nos futuro. Nos ta gradicido na cada habitante, cada embahador di turismo, cada empresario, cada voluntario, cada empleado, cada organisacion y cada partner cu den e 35 añanan tras di lomba a yuda duna forma na e historia turistico di Boneiru. Hunto nos a edifica un destinacion cu rond mundo ta cosecha admiracion, mientrastanto nos ta sigui compromete nos mes cu proteccion di nos naturalesa, nos cultura y nos comunidad cu ta haci Boneiru asina special.”
Mientrastanto cu TCB ta wak den direccion di futuro, e organisacion ta sigui haci esfuerso pa un colaboracion estrecho cu tur stakeholder pa duna forma na turismo di tal manera cu esaki ta fortifica economia di Boneiru, proteha nos patrimonio natural y cultural, crea oportunidad pa generacionnan di futuro y mehora calidad di bida di tur hende cu ta yama Boneiru nan cas.
Na ocasion di e aniversario special aki, Tourism Corporation Bonaire ta expresa su sincero gratitud na tur hende cu a forma parti di e biahe remarkable aki. For di e pioneronan cu na aña 1991 a pone e base te e siguiente generacion cu ta duna forma na futuro di nos turismo: e logro aki ta celebra 35 aña di colaboracion, resiliencia y orguyo. Hunto nos ta wak padilanti pa sigui construi un futuro sostenibel y prospero pa Boneiru.