Gabinete Wever-Croes 1 a wordo instala dia 17 di November 2017. E coalicion MEP POR RED a huramenta pa hiba nos pais den e rumbo di progreso y prosperidad. Mainta tempran dia 20 di November 2017, yen di entusiasmo, Gabinete Wever-Croes a drenta Bestuurskantoor, y di biaha a constata cu e retonan pa salba nos pais lo ta grandi sin niun momento pensa cu retonan mas grandi tawata na caminda.
Desde principio, Gabinete Wever-Croes a mira e urgencia pa cuminsa sania finansas di pais Aruba y cambia e rumbo cu Aruba tawata bayendo den dje. Y hunto mester a tuma pasonan duro pa pone Aruba bek riba e rumbo di finansas saludabel. Na final di 2019, Presupuesto 2020 a worde cera cu un surplus. Esaki den menos di dos aña y despues di decisionnan dificil, basa riba un vision, sacrificio, y compromiso pa saca Aruba for di e problema financiero. Por bisa tambe cu Gabinete Wever-Croes a marca e prome Surplus den nos presupuesto despues di 12 aña. Esaki solamente por a wordo logra door di dedicacion y un maneho structural di un Gobierno serio y responsabel
Manera Aruba completo sa, e di tres aña di gobernacion no tawata ni facil ni normal. Apenas 4 luna despues cu Gabinete Wever-Croes a celebra su di dos aña di gobernacion na unda a entrega un presupuesto cu un surplus, Covid 19 a bin dal duro mundialmente. Gabinete Wever-Croes a wordo enfrenta cu e reto di mas grandi cu cualkier Gobierno di Aruba a yega di encontra. Un crisis enorme. Apesar cu ya caba e crisis financiero y economico laga atras pa un gobierno anterior iresponsabel tawata grandi, e crisis cu Covid tawata hopi mas grandi y a cuasa hopi mas daño. Sinembargo, Coalicion MEP, POR y RED, mescos cu e prome dia, ta determina pa reconstrui Aruba.
Prome Minister Evelyn Wever-Croes: “Aruba a cuminsa un etapa nobo. Un etapa pa reconstrui nos pais. Cu e mesun perseverancia y determinacion di e prome dia, hunto nos lo enfrenta tur reto, sin miedo. Nos ta den e etapa di reconstruccion, di oportunidad pa tur ciudadano, di union y speransa. Y e ser humano ta wordo poni central den tur esaki. Cu determinacion, fe, perseverancia, transparencia, trabou di ekipo y dialogo, lo construi bek nos pais pa entrega e generacionnan nos dilanti un miho Aruba. Nos a demostra caba cu hunto, den tempo di crisis, por saca nos pais for di e rumbo negativo cu nos pais tawata bayendo. Ban ta uni den e etapa aki y hunto reconstrui nos pais. Ami ta cla pa e etapa aki. Aruba ta cla pa e etapa aki. Aruba ta di nos tur y ta nos tur mester hiba nos pais padilanti”.
