Desperdisio di plèstik i sushi riba kaya ta forma un desafío grandi riba Kòrsou. Nos isla tin mas desperdisio di plestik ku na e momentunan aki nos por trata ku ne. Landfill tin un sobrekargo substansial i sigun predikshon lo yega su límite den 2025. Pa e motibu aki TUI Care Foundation, Green Phenix i Mambo Beach a uni forsa den e projekto aki pa logra un Kòrsou mas limpi. Dor di pone diferente bakinan di sushi na Mambo Boulevard, sushi lo wòrdu kolektá. Seguidamente e sushi aki lo wòrdu hibá na un edifisio di resiklashon i e plèstik lo wòrdu kombertí den produktonan atraktivo. E fábrika chikitu aki ta brinda empleo pa personanan di nos komunidat. Nan lo guia turistanan, informanan tokante e aktividatnan ku ta tuma lugá i alabes konsientisá nan di e desafío mundial di polushon de di plèstik.
Kada dia di nobo kantidatnan grandi di sushi ta aparesè na e ‘hotspot’ popular na Mambo Beach. Antes e sushi no tabata wòrdu separá i al final tur tabata terminá na landfill. Danki na e projekto nobo aki, boternan di plèstik i blekinan di aluminio lo wòrdu rekohí na 6 diferente punto di resiklashon – bakinan di sushi speshal- ku lo bai wòrdu poné na Mambo Boulevard. Green Phenix ta resiklá e sushi i ta traha produktonan nobo. E medidanan sosial aki no ta pa solamente rekohé e sushi den e bakinan aki, sino tambe surti e sushi ku wòrdu depositá den sobrá bakinan. Di e manera aki nan ta skohe sushi ku por wòrdu re-usá pa produktonan nobo. Prinsipalmente despues di diferente fiestanan riba playa, lo bai tin lotenan grandi di sushi. Separamentu di sushi den su totalidat ta di suma importansia i meresé mas atenshon posibel.
Biaheronan i habitantenan ku interes den durabilidat i produktonan úniko, por bishitá e fábrika chikitu di Green Phenix. Nan lo haña un bishita guiá i un splikashon tokante e proseso kolorido di resiklashon di plèstik. Un guia lo mustra e proseso kompleto, kuminsando fo’i e surtimentu di sushi, te e fabrikashon di suvernirnan. Durante e guia edukativo aki, bishitantenan lo wòrdu konsientisá tokante e importansia di redukshon di sushi i nan lo risibí tepnan práktiko ku nan lo por apliká den nan bida.
Alexander Panczuk, direktor eksekutivo di TUI Care Foundation: ‘’ Tantu stimulashon i konsientisashon di biahenan di durabilidat, komo e sosten di komunidatnan lokal, ta forma e núkleo di e trabou ku TUI Care Foundation ta hasiendo. E inisiativa aki tin komo meta pa solushoná e problema di polushon di plèstik i pa konsientisá bishitantenan i komunidat kon nan por yuda tene e isla i su playanan limpi. Alabes e ta krea oportunidat di empleo pa e kominidat lokal i ku esei e ta un bon èhèmpel di kon turísmo por trese un kambio positivo na un destinashon turístiko.’’
E projekto ta forma parti di e programa nobo di Destination Zero Plastic di TUI Care Foundation, ku tin komo meta pa aportá na un solushon pa e problema mundial di polushon di plèstik. Dor di inspirá komunidatnan lokal i turistanan pa tuma akshon kontra di polushon di plèstik, prinsipalmente na destinashonnan insular. E programa ta stimulá re-uso di plèstik i ta sostené inisiativanan ku ta produsí produktonan original i atraktivo. Di e manera aki e programa ta brinda oportunidatnan di empleo,den e fabrikanan di resiklashon lokal, entre otro komo guia.
