Na aña 2022 segun balotashon 170.194 bishitante internashonal a biaha pa Boneiru. Esaki ta 12.394 yegada internashonal mas ku na aña 2019. E oumento akí ta surpasá e nivel di promé ku e pandemia, den liña ku e Plan Maestro pa Turismo i e Plan di Rekuperashon di Turismo. Un demanda fuerte di rekuperashon, un nivel di konfiansa mehorá, anulashon di e restrikshonnan den e paisnan di orígen i un ‘airlift’ ku ta oumentando a stimulá e resultadonan akí.
For di e sifranan mas resien ta resultá ku na luna di desèmber nos isla a yama bon biní na 17.162 turista ‘stayover’, loke ta hasié e luna ku a presta mas mihó den aña 2022. E sifranan akí ta mustra e rapides tambe ku kua e sektor a rekuperá di e krísis di mas pió den su historia. Den e di dos mitar di aña 2022 nan a kobra un suma rekòr di mas ku 5,6 mion dòler na impuesto di turista, loke ta mas tantu ku nan a verwagt. Durante e último 6 luna a resultá ku Hulanda ta keda e merkado mas importante pa Boneiru (47% di e total di nos isla), siguí pa Merka (26%) i Kòrsou (12%). For di repartishon di edat di e bishitantenan internashonal ta resultá un presensia dominante di Generashon X i ‘Boomers’ (e grupo di edat entre 45 i 65+). Nan ta bini pa sambuyá, relahá i sosegá i nan ta keda entre 7 pa 14 anochi na Boneiru. Nan ta saka mas tantu sèn na akomodashon, kome i bebe i transporte.
Na aña 2022 e industria krusero a alkansá 66% di e nivel di promé ku e pandemia. 304.298 bishitante krusero (a base di e real bishitantenan krusero na bordo) a bishitá nos isla na aña 2022, kompará ku 457.700 na aña 2019 (a base di e kapasidat maksimal di e barku).
Den kolaborashon ku Entidat Públiko Boneiru i BONHATA, TCB ta ahustá su plannan pa sinkronisá su plannan turístiko mas mihó ku e normal nobo den e temporada despues di e pandemia. Un di e metanan mas importante ta pa kambia e enfoke stratégiko pa atraé e bishitante mas próspero i konsiente di medio ambiente (e kosmopolita) i pa hasi e demanda di merkado norteamerikano mas grandi. “Aña 2022 tabata un aña di kambio ku a mustra un revitalisashon i rekuperashon di e sektor turístiko. TCB ta rekonosé i aploudí e ‘partnership’ i dedikashon di tur stakeholder na momentu di realisashon di e resultadonan akí i ta sigui hasi esfuerso pa un industria turístiko sostenibel ku ta enfoká riba outentisidat, kultura i e identidat úniko di Boneiru”, segun Miles Mercera, direktor di TCB.