Búskeda di e turista merikano Jessica Collins di 47 aña di edat ta kontinuá. Un punto di kontakto lokal pa barku krusero a mèldu su desaparishon riba djaweps 18 di sèptèmber 2025 na polis.
D
járason 17 di sèptèmber señora Collins a baha ku un tas di lomba for di e barku krusero Carnival Horizon na Boneiru. For di e dia ei, e no a regresá bèk i tur forma di kontakto direkto a disparsé.
Despues di a risibí notifikashon polis a kuminsá direktamente ku búskeda, manera ta usual den kaso di desaparishon i konforme protokòl standart. Den kaso di desaparishon kada sekònde ta konta, pa e motibu ei a pone medionan amplio. Tim di Kuido Básiko di Polis (BPZ – polis uniformá) a bai buska físikamente na diferente sitio, manera akomodashon turístiko i diferente bario. Manera ku tabatin pista nobo, e tim tabata sigui nan mesora.
Ademas e tim di reshèrshi a kuminsá skucha testigu i wak imágennan di kámara pa establesé un liña di tempu kla di tur moveshon di Collins. Djárason 17 di sèptèmber te ku alrededor di 3.15 or di atardi por a sigui su moveshonnan, despues di esei tur pista a disparsé.
Durante dia di djaweps 18 di sèptèmber polis a logra lokalisá un miembro di famia di Collins. Tin señal ku probablemente el a tuma kontakto ku famia i despues posiblemente ku e barku krusero. E kontaktonan no tabata sufisiente pa determiná si Collins ta seif. P’esei lo sigui ku e búskeda sin stòp.
Yamada
Polis ta hasi un yamada urgente na Jessica Collins pa tuma kontakto ku outoridatnan lokal i pa laga sa ku e ta seif.
Ademas nos ta pidi pa tur persona ku a mira Jessica despues di djárason mèrdia 17 di sèptèmber 2025, òf ku ta disponé di informashon di su lugá di estadia, pa mèldu esaki.
Tuma kontakto inmediatamente ku polis via di 911, 715-8000 òf liña di tep anónimo 9310.