E barku krusero Seabourn Odyssey ku tabata nabega den bisendario di Colombia a kaptá un ‘may call’ di un boto di piskadó riba laman grandi. E boto di piskadó a boltu i su tripulashon tabata tin mester di yudansa urgente. E barku krusero a meldu e Sentro di Reskate i Kordinashon di Wardakosta di e reskate ku nan ta bai hasi. Mesora Seabourn Odyssey a kambia direkshon pa bai reskatá e tres hòmbernan riba laman. Wardakosta su Sentro di Reskate i Kordinashon ta responsabel pa un area (search and rescue area) inmenso den mar Karibe, pa e motibu aki RCC a kordiná e reskate huntu ku e barku krusero.
Despues ku e tres personanan a ser reskatá riba laman e barku a trese nan Kòrsou komo ku e isla tabata nan ‘next port of call’. Un tim di Metal Shark, konsistiendo di personal di Wardakosta huntu ku milisianan a bai buska e personanan na e barku krusero i trese nan tera. E tres hòmbernan a ser entregá na outoridatnan lokal pa por sigui atende e kaso.
