En conexion cu Dia di Lider, Fundacion Pa Nos Muchanan (FPNM) a organisa un workshop “Lesamento ta Dushi” cu a tuma lugar riba diasabra mainta, 13 di November 2021. Un total di 56 trahadornan pedagogico di diferente centro di cuido y guia di mucha a participa den e workshop aki.
E mainta a habri unda cu directora di FPNM Sra. Natasha Gilkes, directora, a lesa un poema special pa e trahadornan pedagogico. E poema ta enfoca riba con importante y special nan ta e den e bida di cada mucha.
Despues di esaki, Sra. Kristel van Nes, un Logopedista cu ta traha na FEPO a duna un presentacion tocante e desaroyo comunicativo bou di muchanan y algun tips kico e trahadornan pedagogico por haci den nan centro pa asina stimula lesamento di buki bou di nan muchanan.
Sra. Milvienne Dijkhof, boluntario di Fundacion Bon Nochi Drumi Dushi, a sigui cu su presentacion unda e la splica tocante e funcion di bukinan, e tipo di bukinan muchanan gusta lesa y na cua edad, y con pa haci e ambiente den un centro di cuido y guia di mucha uno cu ta promove lesamento.
E ultimo presentacion tabata di Sra. Jessica van Montfoort-Posner, kende ta e fundador di Playhouse Entertainment. Cu ayudo di Unoca y Fundacion Lanta Papiamento a crea un animacion y bukinan na papiamento cu ta popular bou di nos muchanan “Fun with Nini.” Sra. Jessica a duna un splicacion con tur por uza e bukinan y materialnan di Fun with Nini pa stimula lesamento bou di muchanan den nan Centro di Cuido.
Tur trahador pedagogico presente a ricibi un pakete di Fun with Nini como donacion for di Playhouse Entertainment. Cada pakete ta consisti di 2 buki di Fun with Nini na Papiamento, un peluchi di Nini, Set di tayo pa mucha, y un “sippy cup” cu potret di Nini riba dje.
E workshop a clausura cu un tarea unda e trahadornan pedagogico mester a forma grupo y traha nan propio storia di haraña Nini. Cada grupo a haya oportunidad pa presenta nan storia. Algun ehempel di storianan cu a wordo presenta ta “Nini ta bay dentista”, “Nini ta bay riba un bus trip”, y “Nini ta bay lama.”
FPNM kier gradici cada orador cu a forma parti di e workshop di “Lesamento ta Dushi.” FPNM tambe kier gradici cada participante pa nan presencia y kier desea cada trahador pedagogico un Felis Dia di Lider.
