Minister di Salud Publico, Desaroyo Social y Labor (VSA), Richinel Brug, a join e Departamento di Ambulance awe marduga pa realisa un turno den apoyo di e parada di J’ouvert Morning.
E experiencia aki a brinda e Minister un bista di prome man riba e evento for di e perspectiva di e personal di ambulance, resaltando un dimension diferente di e trabou di prome linea. Maske e Minister a sirbi anteriormente hunto cu VKS y oficialnan di polis, e oportunidad aki a duna un bista profundo riba e papel critico cu e ekiponan di ambulance ta hunga den monitor, reacciona y brinda cuido medico inmediato durante eventonan publico di gran escala. E parada di J’ouvert Morning ta keda un di e celebracionnan cultural mas vibrante di e isla, atrayendo gran cantidad di hende y exigiendo un planificacion cuidadoso pa garantisa siguridad publico.
Minister Brug ta extende su sincero aprecio na tur e trahadonan di prome linea cu tabata na warda durante e evento, incluyendo personal di ambulance, oficialnan di polis, bombero y tur otro servicio di emergencia y apoyo cu a traha incansablemente tras di cortina pa garantisa un celebracion sigur.
“Como un ex-trahador di prome linea mi mes, mi ta comprende e dedicacion, e oranan largo y e sacrificionan cu ta bin hunto cu e responsabilidad aki,” Minister Brug a declara. “Mientras hopi hende ta disfrutando di e festividadnan, nos trahadonan di prome linea ta enfoca riba mantene tur hende sigur, y nan esfuersonan no semper ta haya e reconocimento cu nan merece berdad.”
“Ta danki na e profesionalismo di nos trahadonan di prome linea y e cooperacion di e publico, cu eventonan manera J’ouvert por tuma luga di un forma sigur y exitoso,” el a agrega. “Mi ta orguyoso di a para banda di nos ekiponan di prome linea y di por gradici nan personalmente pa nan servicio inestimabel na nos comunidad.”
Ministerio di VSA ta felicita tur esnan involucra pa contribui na un parada di J’ouvert Morning sigur y exitoso.
