ORANJESTAD,Aruba
Rotary Club Aruba a sigui di cerca e desaroyonan pa cu COVID-19 y e medidanan cu Gobierno a bin ta anunciando riba e topico aki. Awor cu Gobierno di Aruba a revoca diferente di e medidanan, Rotary Club Aruba a tuma e decision pa sigui cu e sorteo di rifa, cual lo tuma lugar dia 20 di juni 2020. Pa evita aglomeracion e sorteo aki lo tuma lugar “live” via nos Facebook page. E sorteo di rifa lo ta pa 5:00PM den presencia di un notario.
Esnan cu no a logra cumpra nan ticket ainda, por hasi esaki cerca miembronan di Rotary Club Aruba. Ademas,Rotary Club Aruba lo tin un lugar destina pa bende ticket pa e rifa ariba e parking lot di Alhambra Shopping Mall riba diasabra 20 di juni 2020. Naturalmente teniendo na cuenta tur precauion pa cu distanciamento social.
Benta di rifa a cuminsa desde januari. Tambe por a mira miembronan di Rotary Club Aruba durante parada nan di Carnaval promoviendo esaki grandemente. Door di e iniciativa nan aki e benta di e rifa a bai positivo. Esaki ta importante pasobra e rifa ta un di e manera nan cu Rotary Club Aruba ta recauda fondo pa asina por brinda ayudo financiero na diferente organisacion nan aki na Aruba. Den e momemento nan dificil cu nos isla ta pasando aden ta importante pa por brinda e ayudo aki na organisacionan cu mas mester di dje pa asina yuda nos comunidad surpasa esaki positivamente.
Presidente América Barrios kier a gradici pueblo di Aruba y nos colaboradornan pa e sosten continuo, hasta den momentonan mas dificil. Esaki realmente ta demostra e confiansa cu comunidad tin den e organisacion y ta duna tur miembro e energia pa sigui hasi e trabou aki.
Pa locual ta trata e grandioso feria conoci como Fiesta Rotaria, esaki, lamentablemente a ser posponi pa otro aña 2021.
Sigui nos ariba nos pagina social “Rotary Club of Aruba” pa keda na altura di ultimo informacionan.
