ORANJESTAD, Aruba
Camara di Comercio y Industria (KvK), ta sigui urgi Gobierno di Aruba pa tuma e pasonan necesario mas pronto cu ta posibel pa crea mas oportunidad pa continuacion di negoshinan. Ya pa varios luna caba companianan ta confrontando un reduccion significativo di actividadnan economico. E aumento drastico actual den casonan di contagio local di COVID-19 y e medidanan relaciona cu esaki probablemente lo resulta den un disminuion adicional di e consumo en general.
Durante e ultimo lunanan, hopi compania mester a haci uzo di nan reserva pa por a sigui cubri nan gastonan fiho y continuo. E inseguridad pa locual ta trata e poder di compra y comportacion di e consumidornan den e proximo lunanan, como tambe e incertidumbre relaciona cu continuacion di e subsidio door di Gobierno (“loonsubsidie”) y e posibilidad pa Aruba logra bolbe atrae turistanan, ta haci e situacion aun mas dificil pa negoshinan sigui opera sin un restructuracion di nan gastonan y actividadnan.
Pa evita un ola di companianan cu lo bay bancarota, ta esencial pa crea mas espacio dentro di e opcionnan cu tin. Un compania cu por lo pronto no ta logra “break-even” por opta pa pone e compania “dormant” pa un periodo defini. Den e scenario aki, ta posibel pa termina e relacion di trabao cu e empleadonan y tambe elimina e gastonan continuo por completo, pero e negoshi ta keda registra den e Registro Comercial y su licencia pa haci negoshi ta keda valido y despues di e termino stipula por reanuda su operacion sin tin mester di inicia e proceso full di nobo. E obligacion di e dunado di trabao di paga e ultimo salario di su personal, incluyendo e dianan di vacacion acumula, ta keda vigente. Cesantia y otro gastonan lo por wordo regla via SVB (“noodhulpfondsen”). Esaki lo kita e obstaculonan cu ta impidi continuacion di e negoshi y lo facilita e “comeback” di e compania dentro di e periodo defini. Den tal caso, ta sumamente importante pa mantene un red di siguridad social, manera e actual FASE, pa por garantisa e bienestar di nos comunidad.
Un otro scenario ta cu e negoshi ta opta pa permanece activo, pero en bista cu su volumen di benta a disminui lo mester tin flexibilisacion di e leynan laboral pa por permiti e dunado di trabao laga e trahadonan traha dianan y/o orarionan reduci cu pago di e salario minimo pa ora, cu ta vigente den e sector corespondiente. Den caso cu reduccion di e orario di trabao no duna suficiente resultado, e companianan lo mester tin e posibilidad pa por entrega un peticion di retiro di personal cerca e “Ontslagcommissie” por medio di Departamento di Labor. Actualmente e peticionnan pa retiro di personal no ta wordo acepta, locual ta en contra di e stipulacionnan den ley.
Si e leynan laboral rigido no wordo adapta a corto plaso, hopi compania lo haya nan mes obliga pa innecesariamente opta pa bancarota. E consecuencia di esaki lo tin un impacto negativo grandi riba nos comunidad. E entrada pa e caha di Gobierno lo wordo afecta y di otro banda hopi trahado lo perde trabao.
KvK ta spera cu Gobierno lo duna oido na su conseho y cu esaki lo resulta den e flexibilisacionnan desea cu ta sumamente necesario.
Aruba, 12 di augustus 2020
Camara di Comercio y Industria (KvK)