E tabata un campaña cortico pero hopi intensive, tabata e prome palabranan di Robert Candelaria, candidate di partido AVP, despues cu el a caba di deposita su voto.
El a bisa cu ta bedad cu pueblo ta pidi caranan nobo. Y e ta un di nan, aunke cu el a bini cu su experiencia. E mes, el a bisa, tin idea di loke por ta miho. E ta convenci tambe cu e lo por pone husticia, y otro ministerionan, na un nivel mucho mas halto di loke e ta aworaki. “esey ta yena nos di hopi animo pa logra haci esaki un realidad.”
E problema di ilegalidad tambe ta algo cu tin su atencion. Mester haci e posibilidadnan di entradanan ilegal menos y cu nan por bay nan pais mas lihe posibel. Pero tambe mester ataca e problema di otro banda, atende cu esnan cu ta yuda e personanan cu ta trece un competencia inhusto, un mal uzo di e hendenan.
“Mi kier pa husticia haya su trankilidad bek. Nan mester sinti cu esun sinta riba e stoel kier scucha y traha hunto cu nan, pa sirbi comunidad.”
Candelaria a wordo compaña pa su esposa y su yiu, kende ta vota pa prome biaha.
Robert Candelaria: Mi kier pa husticia haya su trankilidad bek
