Den siman aki, miembronan di Parlamento Dennerich Kelly y Otami Thomasia a realisa un serie di bishita di conocemento pa tuma un mira mas profundo den funcionamiento di diferente instancia di gobierno y organizacionnan di bario. Den e marco aki, nan a bishita Bureau City Inspector y despues a tene un encuentro na cancha di futbol di Unistars na Pos Chikito, caminda diasabra ultimo tabatin un gran campaña di limpiesa pa e bario, conoci como “Baki den Bario”.
Durante e bishita na Bureau City Inspector, e parlamentarionan a ricibi un presentacion detaya riba e trabou esencial cu e departamento ta realisa tur dia. Bureau City Inspector ta funciona como un meldpunt caminda ciudadanonan por reporta lugarnan cu ta uza ilegalmente pa dump sushi, tanto riba tereno publico, como priva.
E sistema di registro y di siguimento cu e departamento ta opera a laga un bon impresion riba e dos parlamentarionan, mustrando cu, a pesar di limitacion di medio financiero, falta di personal y reto den cooperacion interdepartamental, e ekipo ta sigui duna un contribucion valioso pa mantene nos isla mas limpi y mas saludabel.
Kelly y Thomasia a enfatisa cu un bario limpi no ta solamente un cuestion estetico, sino un condicion cu ta impacta directamente riba salud y bienestar di nos comunidad. Nan a haci un yamada special na hobennan di Aruba pa tuma un rol mas activo den comunidad: “Mira rond di bo cas, bo bisiña y bo bario. Saca un man, yuda bo prohimo y sigui traha hunto pa un Aruba mas limpi.”
Segun Kelly y Thomasia, solamente cu solidaridad, unidad y sostenibilidad, por logra un cambio real. E tres aspectonan ta importante pa e parlamentarionan pasobra nan ta forma base di e ideologia Cristian Democrata cu AVP ta para p’e.
Parti esencial di rol di parlamentario ta vigila gobierno y scucha preocupacion di pueblo. Basa riba esaki, Kelly y Thomasia a confirma cu ya nan a dirigi un serie di pregunta formal na ministerio encarga cu infrastructura y medio ambiente, specificamente riba maneho di desperdicio na Aruba.
E campaña “Baki den Bario” ta un di e hopi ehempel di esfuerzo comun pa yuda fortalece bario y, na termino largo, un Aruba mas salud, sostenibel y orguyoso.
