Dialuna dia 9 di mei, 2022, Oficina di Turismo, lo cuminsa cu su serie di ‘podcast’ titula “A.T.A. Talks About”.
E proposito di e ‘podcast’ aki den su totalidad ta pa conta di e structura, responsabilidadnan y prioridadnan di A.T.A. como organisacion, como tambe e papel den diferente aspecto di nos turismo. E ‘podcast’ aki lo enfoca tambe riba e diferente trabaonan cu ta tuma luga na A.T.A. y riba e personanan cu ta eherce e trabaonan aki. Informacion general di turismo, di proyectonan importante, como tambe reto y oportunidadnan lo wordo exponi. Esaki pa medio di conversacionnan cu nos ta spera lo agrega balor na siguidornan y lo contribui na conocemento di A.T.A. y di nos turismo, e pilar di nos economia y su importancia den nos bienestar.
E prome episodionan lo ta mas enfoca riba A.T.A. como organisacion y sigur tambe riba e diferente mitonan cu tin den comunidad over di A.T.A. E prome episodio lo ta dialuna dia 9 di mei, 2022 pa 8:00p.m. via e pagina di Facebook di Aruba Tourism Authority y Sopi Mix Studio.