Komishon di Informadó di Demokrat a tuma nota di varios notisia sirkulando f’e dia despues di elekshon te awor, ku MPB ku UPB ta hibando kombersashon mutuo kaba pa yega na kontinuashon di e koalishon anterior.
Komishon di Informadó di Demokrat ta poko sorpresá ku varios persona ta preferá negoshá via prensa, en bes di sigui un proseso transparente i strukturá pa nos yega na un gobiernu stabil i duradero.
Demokrat, komo partido ku pueblo a skohe pa inisia e proseso di formashon, no ta negoshá via prensa. Nos ta kere ku – banda di tur otro problema ku a surgi i oumenta den e periodo di gobernashon ku a pasa – gran parti di e sklama pa kambio ku Boneiru a laga tende riba dia 15 di Mart tin di deber ku e falta di transparensha, e falta di dunamentu di kuenta i rason na pueblo ku Boneiru a eksperiensha den e ultimo añanan.
Manera Partido Demokrat a indika kaba den su komunikado di prensa di ayera, komo partido ku e total di voto mas grandi di Boneiru, nos a tuma inisiativa pa habri kombersashonan pa yega na un gobiernu nobo mas pronto ku posibel.
Manera indiká ayera tambe, kombersashonan ta andando, i nos lo tene pueblo na altura di tur paso ku tin konsekuensha klaro pa formashon di un gobiernu nobo.