TCB ta informá
Tourism Corporation Bonaire (TCB) a kompartí informashon turístiko preliminario pa luna di yüni 2025, for di kua ta resultá ku Boneiru a risibí 13.606 bishitante stayover. Esaki ta un oumento di 12,2% kompará ku luna di yüni 2024, ora ku 12.117 bishitante a yega nos isla.
E bishitantenan for di Hulanda a forma e grupo di mas grandi, representando 38,7% di e kantidat total di visitante, ku 5207 bishitante. E bishitantenan for di Merka tabata e di dos grupo mas grandi, esta 34,8% di e kantidat total di visitante, ku 4732 bishitante.
En total 1965 bishitante (14,4%) for di Kòrsou a bishitá nos isla, siguí pa Aruba ku 274 bishitante (2%), Alemania ku 199 bishitante (1,5%), Bélgika ku 182 bishitante (1,3%), Colombia ku 148 bishitante (1,1%), Canada ku 84 bishitante (0,6%), Suisa ku 82 bishitante (0,6%) i Brasil ku 61 bishitante (0,4%).
Mayoria di e bishitantenan merikano a biaha huntu ku un partner, siguí pa e bishitantenan ku ta biaha nan so. Mayoria a bini pa vakansi (49,1%), sambuyamentu (37,9%). Mayoria di nan a hospedá den un hotèl (55,6%), un vila (14%), nan propio bibienda (6%), un apartamento (5,2%) òf serka un miembro di famia (3,8%). E bishitantenan merikano a bini prinsipalmente for di Florida, Texas, New York, California i Pennsylvania. E repartishon di edat ta mustra ku e biaheronan di edat mas haltu di 45 pa 54 aña a representá 21,8% di e bishitantenan, miéntras e biaheronan di 55 pa 64 aña a representá 17,7% di e bishitantenan.
Mayoria di e bishitantenan hulandes a biaha huntu ku un partner i despues ta sigui e bishitantenan ku ta biaha nan so. Mayoria bishitante a bini pa vakansi (70%) i pa bishitá amigu i famia (9,4%). Mayoria di e bishitantenan a hospedá den un hotèl (50,2%), siguí pa un apartamento (14,2%), serka un miembro di famia (11,2%), den nan propio bibienda (5,2%) i den un vila (4,4%). Mayoria di e bishitantenan hulandes a bini for di Noord-Holland, Zuid-Holland, Noord-Brabant, Gelderland i Utrecht, kaminda e grupo di edat di 55 pa 64 aña (21,9%) i e grupo di edat di 25 pa 34 aña (20,8%) a forma e segmentonan di mas grandi.
Pa mas informashon tokante Boneiru su prestashonnan turístiko, bo por bishitá www.bonaireisland.com òf bo por tuma kontakto ku nos via email na info@bonaireisland.com.