Riba enkargo di Entidat Públiko Boneiru, Banko Mundial ta hasi investigashon pa loke ta trata kapasidat di sosten sostenibel pa senarionan urbano i turístiko pa nos isla. E investigashon ta duna sosten na Kolegio Ehekutivo na momentu di hasi eskoho stratégiko riba tereno di desaroyo sostenibel.
E promé fase di kompilashon di informashon a enserá un enkuesta bou di habitantenan ku a dokumentá e prioridatnan i sintimentunan lokal relashoná ku desaroyo urbano i turístiko, i a tene entrevista ku stakeholdernan importante for di diferente sektor. E siguiente fase di e proyekto ku ta bai kuminsá awor, ta konsistí di enkuentronan di ‘town hall’ kaminda ta invitá habitantenan pa partisipá i kompartí nan vishon riba desaroyo sostenibel di Boneiru.
For di 8 di novèmber te ku 10 di novèmber 2022 ta organisá vários seshon di ‘town hall’ den e diferente barionan na nos isla.
Pa medio di esaki kordialmente nos ta invitá bo pa partisipá na un di e siguiente seshonnan di ‘Town Hall’. Entrada ta grátis i inskripshon no ta nesesario.
tokante futuro di nos isla. Pa por tuma e desishonnan akí ta importante pa disponé di informashon i konosementu korekto. Nos ta hopi kontentu ku tur e input ku ya kaba nos a haña serka boso i nos ta spera di tin mas kombèrsashon profundo durante e enkuentronan di ‘town hall’”, segun señor Hennyson Thielman, diputado di Desaroyo Ekonómiko, Turismo i Finansa den Kolegio Ehekutivo di Boneiru.
Señor James Kroon, diputado di Infrastruktura i Medio Ambiente a agregá: “Nos ta mira nos isla krese i nos sa ku ta importante pa hasi eskohonan konsiente pa futuro. Nos infrastruktura ta bou di preshon i nos ta trahando riba un Plan di Desaroyo Espasial revisá. E investigashon akí ta yuda nos den esei. Otro siman nos ta spera di skucha boso ideanan relashoná ku e senarionan pa kresementu sostenibel”.
E ‘Technical Assistance Program for Disaster Risk Financing and Insurance’ ku Union Oropeo ta finansiá den paisnan i teritorionan den área karibense (LGO) i ku ta bou di maneho di e ‘Global Facility for Disaster Reduction and Recovery (GFDRR)’, ta finansiá e programa. E programa ta forma parti di e ‘Caribbean LGO Resilience, Sustainable Energy and Marine Biodiversity Program (RESEMBID)’.
Gobièrnu di Boneiru i Banko Mundial ta enkurashá tur habitante di Boneiru pa partisipá na un di e enkuentronan di ‘town hall’ i laga nan bos resoná pa loke ta trata un tarea asina importante manera stipulashon di e futuro kresementu di kapasidat di sosten di nos isla.