Aruba Hotel & Tourism Association (AHATA) a organisa un panel di studiante titula “Expectativanan di Trabou” durante nan asamblea general. E panel ta e prome iniciativa di e asociacion pa habri un dialogo constructivo y mehora e comprension entre dunado di trabou y e generacion di trahado nobo.
E panel, modera pa Rosabelle Illes, Psicologo y Assistant Professor na Universidad di Aruba, a consisti di studiantenan di hospitalidad di Colegio EPI y Universidad di Aruba, ken a drenta den dialogo hunto cu representantenan di dunado di trabou for di Marriott Aruba y ECO Destination Management Services. E dialogo a enfoca riba e expectativanan y condicionnan cu ”Gen Z” tin di pa nan futuro trabou y tambe nan motivacion y aspiracion pa nan carera.
Miembronan di AHATA a mustra gran interes den e panel, y tambe a participa activamente cu preguntanan pa e hoben panelistanan. E panel a brinda perspectivanan valioso pa dunadonan di trabou como tambe pa e studiantenan, asina contribuyendo na e comprension necesario pa mantene un ambiente laboral productivo y harmonioso pa tur.
E inicitiva aki no solamente ta yuda crea un comprension mas profundo entre generacionnan, pero tambe ta crea e fundeshi necesario pa sigui desaroya y mehora e panorama laboral den e industria di hospitalidad. Asina brindando un colaboracion prospero pa sigui reforsa e exito di nos industria turistico.
AHATA ta extende gratitud na studiantenan Kevin Illes y Arantxa Erasmus di Colegio EPI, y Thaïtia Schenker y Timothy Fowler di Universidad di Aruba pa nan contribucion valioso. Tambe un danki na Maoreen Every, Managing Director di ECO DMS, Ruthline Theysen, Complex Director di Human Resources di Marriott Aruba y Raoul Lemmerling, Complex General Manager di Marriott Aruba pa comparti nan perspectiva y experiencia den e panel.
