Fraccion di AVP a yama un conferencia di prensa y ta indica cu den e reunion di presupuesto cu a tuma luga ultimo oposicion a trece hopi padilanti recortenan y of intencion di recortenan den e area social principalmente den FCCA. Parlamentario Stephany Sevinger ta di opinion y ta indica cu FCCA ta un instancia cu personanan cu tin un entrada mas abou por aplica na un cas social y gobierno ta subsidia un parti di e huur na e comunidad.
Segun parlamentario Stephany Sevinger loke cu gobierno ta aporta na dje ta ofrece terenonan na FCCA y ta encarga loke ta e infrastructura rond di e terenonan aki. Sinembargo loke cu gobierno no ta haci ta fia placa na FCCA. Den un mocion cu a keda treci padilanti door di fraccion di MEP dia cu a trata presupuesto di Pais Aruba den e punto number 4 unda cu FCCA no ta disponi di suficiente fondonan pa por construi casnan social nobo. Den e mosion di MEP ta indica cu casnan social no a keda construi den e ultimo añanan unda cu MEP mes ta bisa cu FCCA mes no por a yega na fondonan pa contrui casnan.
Sinembargo Parlamentario Stephany Sevinger ta kere cu mester tin un splicacion kico por ta e causa cu ta impedi cu FCCA por yega na fondonan nacional y of internacional pa nan por traha casnan social. E preguntanan aki lo wordo haci pa e minister encarga cu e parti aki.
Banda di esaki parlamentario Stephany Sevinger tin un bon noticia pa Aruba, manera tin problema na Aruba tin solucionnan tambe segun e politico. Den plan di gobernacion di AVP-FUTURO no solamente tin e pensamento pa subi e huursubsidie specialmente pa esunnan cu ta huur for di FCCA , pero tambe baha e presion cu FCCA tin na e momentonan aki pa introduci un huurtoeslag.
Si abo ta un persona cu un salario minimo y b ta huur for di FCCA unda cu gobierno ta yudabo subsidia bo huur, pero si bo ta un persona cu ta gana e mes un salario abou y bo no ta huur for di un cas social bo no ta haya e huursubsidie. Parlamentario Stephany Sevinger ta kere ta importante pa kita e discriminacion aki y introduci un huurtoeslag unda cu tur hende cu tin un salario abou por yega na remarca y cu por yega na un ayudo financiero.
Tambe lo haci pregunta na e minister concerni con tin pensa pa cuminsa cu e introduccion di huurtoeslag y con e dialogonan pa e huursubsidie ta cana.