For di 2009 cu gabinete Mike Eman a sinta ya caba tabatin un tendencia di bandona edificionan di gobierno, esun cu tabata mas conoci tabata nos cas di gobernacion cu ta bestuurskantoor. E tempo ey bestuurskantoor tabata den hopi mal estado, sinembargo nada no a cambia , na momento cu gobierno di AVP-FUTURO a sinta a constata varios edificio bandona y un di nan cu ya caba a Sali y vocifera riba dje ta e edificio di Reina Beatrix School.
Parlamentario Stephany Sevinger kier atencion di e minister concerni pa duna amplio splicacion di cuanto edificio di gobierno a keda bandona, cuanto e lo costa pa restaura of mantene nan, pero tambe kier sa debi na e negligencia nan aki cuanto edificio Aruba mester a huur y cuanto lo e afecta e presupuesto di gobierno.
Den e plan di gobernacion pa reduci e gastonan di gobierno Parlamentario Stephany Sevinger ta kere cu ta bon pa yena e edificionan di gobierno cu ta bashi unda cu mester restaura nan y mantene nan pa asina por recorta e gastonan cu pais Aruba tin na edificionan di huur, pero tambe baha e gastonan di mantencion na edificionan cu no ta di gobierno. E pensamento aki ta den pagina 53 di gobernacion di AVP-FUTURO y ta enfoca pa por cumpli cu esaki.
Tambe Parlamentario Stephany Sevinger ta para keto un rato riba e declaracion cu prome minister Mike Eman a haci ultimo unda cu dia 30 di April awo e pensionadonan lo haya nan 250 florin. Un gobierno cu tin apenas 1 luna ta bin cu cambionan drastico y positivo pa comunidad di Aruba. Segun parlamentario Stephany Sevinger no ta solamente e 250 florin lo keda duna na e pensionadonan pero na mes momento lo reintroduci e pakete di medicina pa nos grandi nan pero pa nos comunidad completo tambe. Parlamentario Stephany Sevinger ta kere cu esaki nan ta cambionan positivo cu ta tuma luga y ta spera cu por mira esaki mas awor padilanti