I am text block. Click edit button to change this text. Lorem ipsum dolor sit amet, consectetur adipiscing elit.
Nos tin temanan pendiente ketobay pa relata, pero tin biaha ta presenta algo cu nos ta sigui
nos curason cu ta dirigi atrobe, den un sintimento tristo cu e entierro di nos prome Prome
Ministro di Aruba Jan Hendrik Albert “Henny “ Eman, cu a bay nos dilanti cu edad di solamente
76 anja. Nos lo hasi nos best pa despues si bini cu e temanan cu falta y tambe cu nos relato
encuanto e bunita presentacion di Ruthy su prome buki na papiamento pa mucha di scolnan
basico danki na UNOCA y Aruba Bank cumpliendo nan di 100 anja. E bautismo di e buki “Rene
su dushi wega “a tuma lugar Diaranzon dia 15 di januari ultimo na Unoca. Awe algo di entierro
di Henny Eman, aunke tur medio den prensa a cubri esaki caba. Awe nos version di curason.
Como Poeta di pueblo Lady Ruth a skirbi un poema acrostico cortico cu su nomber Henny Eman
pero tawata mucho laat den su asercamiento na e comishon y asina e poema aki a sali si publica
den Diario y ariba EANews y tambe den Extra Bonaire. Lady Ruth ta gusta sigui su inspiracion
di curason y skirbi pa esnan cu bini na su curason. Nos no sa si ela sali den Solo di pueblo, ya cu
pa algun siman buscando Solo na algun di e supermercadonan chinees of citgo no por a hanja. Of
nan a caba of no tawatatin e dianan ey. Pero, despues cu algun persona na entierro a pidi si mi ta
bay recita den nomber di pueblo, mi a logra aserca y hanja tele aruba pa a lagami recitele y cu ela
wordo scucha y mira te na Hulanda, ora un amiga di mi a mandami e pic cu ela saca fei di e
pantaya di su television of ta computer. Lady Ruth tawata mucho laat cu su peticion di curason.
Pero, nos por comparti e poema atrobe awe den mi relato pa companja locual nos a sinti na e
entierro di Henny Eman, awe den felis memoria. Danki na periodista profesional Nilton Lacle di
Diario cu a pone e poema den un forma nechi y asina elegante siman pasa. Y tambe danki na
Farrah Boekhoudt di EANEWS pa su bunita publicacion on line ! Hopi hende presente, hopi
mandatario e.o. for di Corsouw y Hulanda. Nos lectornan por a sigui e programa completo na
television y varios otro medionan di comunicacion. Varios musico a presenta, e.o. Johnny
Scharbaay ariba piano y e artista cu fam Raven a canta e cancion favorito di Henny cu ta
“Amazing Grace”. E juffrouw aki a canta cu alma, curason y bos potente ponemi y hopi otro
presente bira hopi emocional. Nos flamante minister demisionario sra. Xiomara Maduro a
impacta cu su bunita palabranan di e trayectoria profesional di Henny y a duna elogio y aprecio
pa tur Henny su bon trabaonan. Ta algo bunita y humano sigur, pasobra con cu bo mire y bire ta
contrincantenan di otro nan tawata, principalmente ora di eleccion pa gobierno nobo. Lady Ruth
a sintie bon representa como hende muhe cu un lider manera Xiomara. . E mandatario di
Hulanda sr. Balkenende y tambe e mandatarionan, tres dama bunita tur tres ex prome minister
di Corsouw a papia masha bunita mes di Henny su manera di hiba politica. Pero ta bon so
tawatatin di Henny pa papia di dje ! Lider Mike Eman, ruman di Henny, a repasa hopi di e bon
trabaonan di Henny ariba tereno politico pero tambe ariba tereno familiar cu atrobe a pone awa
na wowo di hopi presente. A reina un paz, un trankilidad den tur e rumannan y sra.Iris,e bunita
esposa di Henny ora a duna nan condolencia. Lady Ruth a sinti nan humildad fey nan bon
curason cu respet pa tur. E predicashi pa duna forsa y consuelo na famia , hiba pa Domi
Hazenoot na hulandes, tambe tawata hopi intensivo y inspirativo mes. Na momento cu Domi a
cuminsa papia a lanta un biento un poco fuerte tumbando dos di e kransnan grandi abao, manera
e bos den biento por a bisa Domi, bendicion den bo palabranan di e bida di Henny, forsa den bo
predicashi !. Tur bendicion ta bini di ariba y di naturalesa, y asina tambe na Santana ora cu awa a
cuminsa fingi fingi cu un regenboog na shelo, mandando bendicion pa tur e curasonnan tristo, pa
duna animo pa sigui padilanti. Un shon para nos dilanti a bisa poeticamente cu na shelo tambe
nan ta tristo y ta yora. Lady Ruth a pensa na e dushi pinda cu ela yega di come foi cunucu di
Henny cu Eda Beijse Kock a trese p’e, Eda cu ta un di e fiel y fuertenan den e actividadnan di e
partido berde, semper cla pa yuda unda cu nan pidi’e. Awor Lady Ruth a wak di serca atrobe,
con stima e rumannan Henny y Mike Eman ta, y cu ta den Mike tambe pa saluda tur hende sea
cu un brasa, un sunchi of un handshake ! Mike tambe ta un cabayero carismatico cu curason
grandi, mescos cu Henny su ruman mayor y mescos cu tur su otro rumannan. Mike tambe ta
hende di tur hende, un homber di hopi sabiduria cu Lady Ruth a yega di huzga robez. Mi
disculpa pa esey . Mike Eman tambe ta un shon di hende cu amor hopi pero hopi grandi pa su
isla Aruba.Nos ta conclui nos relato cu e poema acrostico pa Henny awe dfm. Permitimi
condoleer tambe amigo colega den prensa cu su bunita programanan na television VIP Trevor
Rosel cu e fayecimento di su bunita y kerida mama, sra. Yolanda Filomena Rosel “Yanda”. Cu
sra. Yanda sosega na paz.
Danki pa lesa nos relato di awe, pasa un bon y dushi dia yen di sabiduria den nos alegria !!!
JAN HENDRIK ALBERT EMAN
“HENNY” RIP
H opi stima pa miembronan di su partido berde
E stadista, Lider Politico y prome Prome Minister ehemplar
N iun mescos cu n’e
N os tur awe ta record’e
Y Aruba di luto lo despedi di dj’e
E tambe a traha bon pa su isla stima Aruba
M omentonan tristo cu ta uni su pueblo
A ruba ta gradicido pa tur su bon trabao
N a su Creador di Amor entrega den lus y amor eterno
Ruthy”Lady Ruth”, Aruba Januari 2025.
