Pueblo di Boneiru a haña e oportunidat di sera konosí ku tur instansia ku ta traha huntu riba laman pa seguridat di nos komunidat Koleganan di Kuerpo Polisial Hulanda Karibense, Wardakosta, Duana, Koninklijke Marechaussee, CITRO, Havenmeester, Entidat Públiko Boneiru i STINAPA tabata presente pa kontesta tur pregunta relashoná ku nan trabou.
E dia habri a kuminsá for di 10 or di mainta i a kulminá 2 or di atardi.
E barku ‘Jaguar’ di Wardakosta tabata mara na e waf Juan Francisco “Chicu” Mercelina, pa asina permití tur persona presente subi a bordo di e barku tipo ‘Cutter’ i tira un bista riba e dek, brùg i otro parti nan di e barku ku ta patruya regularmente awanan di Boneiru. Tambe a duna diferente demostrashon riba laman durante di e Dia Habrí.
Pa e demostrashon nan, a hasi uso di e boto nan di tim Multidisiplinario Marítimo Hub Boneiru (MMHB). Miembronan di tur instansia konhuntamente a mustra kon ta hasi kòntròl rutinario di boto nabegando riba laman, kon un intersepshon di boto ku supstansia narkótiko ta tuma lugá, kon ta atendé ku personanan indokumentá na momento ku nan purba di drenta nos awa nan teritorial i tambe a demostrá kon ta salba bida di hende den nesesidat.
E helikòpter di Wardakosta tambe a sòru pa pasa dos bia na waf Juan Francisco “Chicu” Mercelina kaminda e aktividat a tuma lugá i a zuai tur hende for di laira durante di nan patruya.
Di parti Kuerpo Polisial Hulanda Karibense, Wardakosta, Duana, Koninklijke Marechaussee, CITRO, Havenmeester, Entidat Públiko Boneiru i STINAPA nos ke gradisí un i tur ku a bishitá nos Dia Habrí. Huntu nos ta sigui ehekutá nos trabou ku amor i dedikashon pa asina mantené e pueblo di Bonaire seif.
