Awe a tuma lugá apertura ofisial di e parke di mucha nobo den e bario di Nieuw Amsterdam na Boneiru. Ku realisashon di e parke moderno i seif akí, Boneiru ta dal un paso importante den direkshon di promoshon di un estilo di bida salú i aktivo bou di hubentut. E parke ta ofresé muchanan den e bario – i mas aleu di esaki – hopi espasio pa move, rekreá huntu i desaroyá nan mes.
Realisashon di e parke ta resultado di un kolaborashon intensivo entre vários partner: Entidat Públiko Boneiru, Fundashon Cas Boneriano (FCB), Jantje Beton, Ministerio di Salubridat, Bienestar i Deporte (VWS), Heren2 (diseño) i Haafkes (ehekushon). Danki na esfuerso i enbolbimentu di tur e partidonan akí, a realisá un lugá di rekreashon bunita i duradero ku ta mehorá kalidat di bida i koheshon sosial den e bario.
E parke di mucha ta kuadra perfektamente ku e ambishon di Boneiru pa hasi deporte i moveshon aksesibel pa tur mucha, i pa stimulá muchanan na un manera positivo pa un estilo di bida aktivo. INDEBON ta gradisí tur partner ku a kolaborá, habitantenan di bario i tur hende ku a kontribuí na éksito di e proyekto akí.
Ku apertura di e parke di mucha akí, no solamente ta enrikesé e bario di Nieuw Amsterdam, sino ta suprayá tambe importansia di invertí den hubentut i un futuro saludabel pa Boneiru.
