Universidad di Aruba, Universidad di Curaçao, Universidad di Utrecht y Universidad di Den Haag ta entusiasma pa comparti nan cooperacion nobo enfoca riba fortificacion di capacidad administrativo den Caribe Hulandes pa medio di siñamento pa henter bida. Den e siman cu a pasa, e partnernan a reuni na Aruba y Curaçao pa start up e proyecto aki cu gruponan di enfoke di varios sector. Durante e gruponan di enfoke aki diferente profesional den nan ramo a duna nan input y perspectiva pa loke ta trata e necesidadnan den nan ramo.
Meta di e partnership y proyecto aki ta pa crea un plataforma digital pa Caribe Hulandes. E plataforma aki lo ofrece un bista centraliza di programanan di enseñansa superior pa fortalece capacidad administrativo den e diferente sectornan riba e islanan pa medio di cursonan, tayernan y masterclass. Esakinan ta consisti di cursonan exsistente cu ta wordo ofreci den diferente programa na e universidadnan partner. Ademas, cursonan lo wordo ofreci den diferente formato manera den persona, hibrido of completamente online, haciendo esaki mas acesibel.
Pa medio di e proyecto aki nos meta ta pa promove siñamento pa henter bida na tur profesional cu ta busca pa adkeri conosemento y abilidadnan, desaroyando nan mes mas aleu. E forsa di e asociacion aki tambe ta sinta den e diferente perspectivanan entre e paisnan, incluyendo contexto y cultura local mientras cu ta mantene un bista internacional.
Press release: Universidad di Aruba
