Abogado mr. A.Kock di Principal a cuestiona na Hof di Corte Superior cu su cliente Izak Principaal tin 4 aña cera den KIA sin haya ningun tratamento.
Por a compronde cu Hof a hala atencion di abogado mr. Kock pa e forma cu e tabata cuestiona Procurador General.
4 AÑA SIN HAYA TRATAMENTO
Mr. Kock a bisa Hof cu el a keda asombra cu tur loke Procurador General (PG) a trece padilanti. E abogado a bisa Hof cu tur e delitonan cu Principaal a haci, e tabata hunto cu Zuriel Celaire. E abogado a bisa cu Principaal tabata stuur y Celaire tabata esun cu a tira riba hendenan dilanti un bar na San Nicolas. El a remarca, unda Celaire ta awor. Na opinion di e abogado, Celaire a influencia Principaal. Ta Celaire a hiba e pistol na e cas unda Shayuri a wordo tira. Na opinion di mr. Kock, ta door di un accidente un tiro a los cu consecuencia fatal.
E abogado a mustra cu Celaire a haya solamente tratamento obligatorio y ainda Principaal ta sera den KIA. E ta haya cu e publicidad cu e caso a haya den media, a crea e impresion den comunidad cu Principaal ta un asesino. E abogado a bisa Hof cu Shayuri tabata manera un ruman di Principaal y e no tabatin motibo pa mata Shayuri.
E abogado ta haya cu door di trata Principaal otro cu Celaire, Hof ta viola e principio di tratamento di caso husto. E abogado a mustra cu Principaal mes a expresa na Hof cu e tin 4 aña cera, sin tratamento y te ainda no tin claridad den su caso.
E abogado a puntra PG si e kier pa Principaal keda cera? Hof a hala mr. Kock su atencion cu Hof a tuma decision caba cu Principaal a tira intencional y no tabata un accidente.
CASTIGO DI ADULTO NO TA BON
Mr. Kock a remarca na Hof cu biaha pasa a condena Principaal na castigo hubenil y awor diripiente ta papia di castigo di adulto. Na opinion di abogado, ta logico cu Principaal ta crece pero no ta corecto cu ta bay aplica castigo di adulto.
E abogado a remarca cu door di miedo pa critica di media, Hues den Promer Instancia a condena Principaal na 9 aña di prison y awor PG ta exigi castigo pisa.
DUNA TRATAMENTO OBLIGATORIO
Mr. Kock a pidi Hof pa impone castigo di tratamento obligatorio den un clinica (TBS) cu condicion manera ta para den e rapport di Respaldo. Esey ta trece cun’e cu Principaal ta wordo laga liber y di biaha e team di Respaldo ta atende y tambe Reclasering. E abogado a sigui bisa cu ora presenta un chens na Hulanda, lo manda Principaal Hulanda pa tratamento.
Hof a bay evalua un rato y a dicidi cu Diaranson lo cera tratamento di e caso y Diaranzon 17 Dec, 1.45 di merdia lo tin sentencia.
Abogado ta cuestiona cu a viola principio di trato husto pa acusado Principaal
