SMAC a sinta na mesa cu Comision di Tumba, tumberonan, representante di banda como tambe Presidente di Hurado, Sr. Ivan Cuandus. Na e reunion informativo aki a trece varios punto esencial dilanti referente Festival di Tumba manera:
● Reglamento di Tumba pa e edicion actual,
● Premionan di Tumba y su structura,
● Logistica general di e Festival,
● Sitio oficial unda e evento lo tuma luga,
● Miembronan di Hurado y nan rol,
● Oportunidad pa presenta Tumba den parada, cu consentimento di lider di grupo y participante,
● Banda musicalnan cu lo presenta durante e festival,
● Forma pa yuda reduci gasto, mirando cu hopi banda ta enfrenta desafio den nan operacion.
Di e forma aki ta busca pa hunto keda mehora e calidad di Festival di Tumba 54 y tambe futuro edicionnan. Hopi sugerencia a surgi, manera posibel cambionan den e manera cu bandanan musical ta presenta durante e evento. Segun Presidente di SMAC, Darren van Ommeren, e reunion aki tabata un encuentro ameno, constructivo y yen di informacion util pa e comision di Tumba. Mientras tanto, SMAC, tin algun diligencia pendiente pa sigui traha riba dje y di e forma aki evalua si cierto ahuste ainda por wordo implementa den e temporada benidero di Carnaval 72. SMAC ta enfatisa si cu despues di hopi tempo, Aruba lo por disfruta di un Festival di Tumba berdaderamente grandi y vibrante. Ticketnan pa e evento lo ta disponibel via Pay.aw y pronto lo ta obtenibel tambe na varios punto strategico di benta rond di nos isla. Pa mas informacion relaciona cu tur evento di Carnaval 72, bishita www.isladicarnaval.com of tambe busca Isla di Carnaval riba plataformanan social manera Facebook y tambe Instagram. E prome festival di Tumba ta di e Tumberitonan cu lo duna nan presentacion dia 16 di Januari proximo cu probablemente lo ta na Carnaval Village na San Nicolas of e ta bay bek na A.E.C.
