Partido Movimiento Electoral di Pueblo (MEP) a celebra su 55 aña di existencia den un ambiente solemne pero tambe carga cu memoria político y reflexion. Na cede di MEP, politiconan actual, ex politiconan, simpatizante y sostenedo di partido a reuni pa conmemora e aniversario cu pa hopi persona ta considera como e partido mas influyente den historia político di Aruba.
Entre e presentenan tabata Ady Thijsen, ex Ministro Plenipotenciario y e ultimo representante di Aruba na Hulanda den e capacidad aki. Aunque Thijsen actualmente no ta activamente den política, e a subraya cu lo e keda disponibel pa yuda unda cu e por, siguiendo compromete cu desaroyo di pais.
Den su intervencion, Thijsen a expresa su orgullo di a forma parti di MEP pa mas cu 20 aña. E a felicita tur “mepistanan” y pueblo di Aruba, resaltando cu MEP tin un rol determinante den construccion di Status Aparte y consolidacion di identidad político di Aruba. Segun Thijsen, e estatus apart no solamente a brinda libertad, sino tambe a contribui na estabilidad economico y institucional di pais.
Sinembargo, aunke a elogia e legado di MEP, Thijsen tambe a reconoce cu tin mester prepara siguiente generacion di lidernan. E a indica cu tin hopi trabou pendiente, specialmente den area di educacion na e sigiente generacion y formacion politico pa futuro generacionnan por participa mas activamente y conscientemente den gobernacion di Aruba.
Durante su trayectoria político den MEP, Ady Thijsen a ocupa varios cargo importante, entre otro como parlamentario, lider di fraccion, Presidente di Parlamento di Aruba, representante di Aruba na Union Europeo y finalmente Ministro Plenipotenciario. E a afirma cu ta satisfecho cu su aportacion na desaroyo di pais, pero tambe consciente cu e reto di futuro lo exigi renovacion y liderazgo nobo.
E celebracion di 55 aña di MEP, por lo tanto, no solamente tabata un fiesta, sino tambe un momento di evaluacion histórico y reflexion pa futuro político di Aruba.
Un di e dichonan cu Ady Thijsen ta keda recorda na dje ta “ Tanten cu MEP ta existi Aruba ta salba”