Durante e reunion di dos dia di IPKO, e tema di ouderenzorg (cuido di adulto mayor) a ocupa un puesto central riba agenda. Parlamentario Gino Goeloe a expresa cu e topico ta haya e atencion cu e merece, no solamente na Aruba, sino tambe na tur paisnan presente den IPKO.
Segun Goeloe, tur islanan ta confrontando cu e reto di vergrijzing (envehecemento di poblacion). E a señala cu no ta un secreto cu Curaçao tambe ta enfrenta un presion grandi debi na aumento di adultonan mayor den nan poblacion.
Durante e reunion, directora di ouderenzorg na Aruba, Desirée Helder, a presenta e situacion local y e plananan actual. Su presentacion a wordo ricibi positivamente pa e otro delegacionnan, cu a mustra interes pa sigui discuti e tema den reunionnan futuro di IPKO.
Goeloe a enfatisa cu un bida digno pa adulto mayor ta un derecho humano. E a indica cu Aruba a tuma pasonan concreto, incluyendo mas fondo pa organisacionnan cu ta brinda cuido na grandi nan, pa fortalece programanan y mehora e calidad di atencion.
Ademas, tin un ley existente cu, segun Goeloe, mester wordo reforza cu mas control y supervision, especialmente riba casnan priva. Actualmente, directora di ouderenzorg y su team ta trahando hunto cu sector priva riba un marco legal mas fuerte pa garantisa proteccion integral di adulto mayor. Tin plananan concreto den desaroyo.
E modelo cu Aruba ta desaroyando a haya interes special di parti di Curaçao, cu kier sigui intercambia informacion den siguiente reunionnan di IPKO.
Finalmente, Goeloe a indica cu Hulanda tin hopi experticio den ouderenzorg y por brinda apoyo tecnico na e islanan di Caribe, pa fortalece conocimiento, forma personal capacita y aumenta interes den e sector di cuido na futuro.