Hopi biaha tin confusion riba e diferencia entre Stichting HUNTO y RESPALDO, dos instituto na Aruba cu ta brinda guia y ayudo den area di salud mental, pero cu un maneho distinto.
Segun miembro di board di Stichting HUNTO , Randall van Tright, e diferencia principal ta den e tipo di atencion cu nan ta ofrece. RESPALDO ta enfoca riba “specialistis geestelijke gezondheidszorg”, cu ta trata pashentnan cu mester atencion psikiatrico specialisa. Na otro banda, Stichting HUNTO ta brinda atencion basico den salud mental, cu un enfoke mas sigosial.
Stichting HUNTO ta mira e persona den su totalidat. Problemanan manera depresion y burnout hopi biaha tin raiz den situacion financiero, relacion familiar of otro factor social. Pa esey, e fundacion ta traha cu un maneho holistico, atendiendo no solamente e sintomanan, sino tambe e circunstancianan rond di e persona.
E organisacion tin psicologonan y trahadonan social, pero no tin psikiatra. Su trabou tin un caracter preventivo: identifica y trata problema prome cu e situacion bira mas serio.
A pesar di limitacionnan financiero, Stichting HUNTO ta logra brinda tur su servicionan completamente gratis na comunidad. Mas di 90% di su fondo ta bin for di subsidio di Gobierno di Aruba. Di e presupuesto anual di 5.5 miyon florin, 2 miyon ta destina pa cuido sigosial den salud mental y 3 miyon pa programa di adiccion.
Aworaki, Stichting HUNTO tin 5 psicologo y entre 7 te 10 trahado social, un crecemento considerabel si ta compara cu su inicio, ora cu e fundacion a cuminsa cu solamente un psicologo.
E decision pa ofrece servicionan gratis ta basa riba e realidad cu hopi persona cu mas mester ayudo ta esunnan cu no por paga un profesional. Stichting HUNTO kier evita situacion unda un mayor of un mama mester scoge entre paga un psicologo of pone cuminda riba mesa.
Cu su sede na Dakota, e fundacion ta sigui compromete pa brinda sosten y guia profesional den caso di depresion, burnout y otro reto relaciona cu salud mental, cu meta di fortifica bienestar di e comunidad Arubano.
