Sujohn Van der Linde ta un studiante di EPI , pero ta coriendo stage na belgie, esaki ta door di un proyecto di intercambio di EPI , e hoben ta conta mas di su experiencia di stage na Belgie. Sujohn Van der Linde studiante di EPI
E programa aki ta un programa cu mi ta kere tin rond di dos aña, y e tin tres diferente programa; esta Erasmus+, E-Rasmus y Iberostar. Den e programanan aki, nan ta brinda e studiantenan di EPI e oportunidad pa por haci stage internacional. Esaki kiermen cu e studiantenan por biaha pa luganan manera Spaña, Mexico, Irlanda y Belgica. Ami mes a scoge pa Erasmus+, y mi a bin Belgica pa haci mi stage.
Ami ta un studiante di ICT na EPI den mi di tres aña, mi ta den e klas di examen di e di tres nivel. Mi a scoge pa haci mi stage den exterior pa mi por haya mas experiencia y un experencia diferente na un otro pais compara cu Aruba. Mi a yega di haci stage caba na Aruba mes, na EPI y tambe na My Computer, pero mi tabata kier experencia un stage den un ambiente y cultura diferente cu hende diferente. Tambe mi kier a mira con nan ta traha den e area di ICT y tecnologia na un manera mas avansa cu na Aruba. Pesey mes mi a scoge pa e stage na Belgica.
Awor cu mi tin un par di dia ta haci stage y bay scol, mi por bisa cu mi ta sinti mi confortabel y mi a custumbra caba. Mi ta sinti cu esaki ta un trabou pa mi mes pasobra mi a adapta caba na e rutina diario di stage. Mainta mi ta lanta, mi ta tuma trein y bus pa mi yega na e scol caminda mi ta haci mi stage. Eynan mi ta traha y mi ta yuda nan cu cualkier problema cu por surgi den e departamento di ICT. Ora mi caba, mi ta bolbe tuma trein y bus pa bay bek cas. E ta sinti manera mi bida normal, caminda mi ta biba y traha aki na Belgica en bes di djis haci un stage.
Diferencianan Tecnologico
Sujohn a nota un diferencia grandi den e manera di traha den e area di tecnologia entre Aruba y Belgica:
- Uso di “Cloud”: Na Belgica, mayoria di e sistemanan ta core via “Cloud”, locual ta nifica cu nan no tin hopi server fisico den e scolnan mes.
- Sistemanan na Aruba: Na e luganan caminda el a yega di core stage na Aruba (manera na EPI mes y My Computer), e sistemanan ta mas basa riba servernan local.
- Nivel Avansa: E hoben ta considera e nivel di tecnologia den exterior como mas avansa compara cu loke el a experencia na Aruba.
Beneficionan di stage internacional
Segun Sujohn, e programa di stage den exterior cu EPI ta ofrece ta hopi positivo pa e studiantenan pasobra:
- Experencia Nobo: E ta duna e studiante un “chance” pa reta su mes den un ambiente nobo y kibra e ciclo normal di Aruba.
- Networking: E ta permiti e studiante conoce hende nobo y amplia nan ret di contacto (networking) internacional.
- Cualificacion pa Futuro: Experencia cultura y metodonan di trabou diferente ta yuda e studiante dicidi si e kier sigui studia den exterior den futuro.
Plan nan pa futuro
Sujohn ta den su ultimo aña di nivel 3 y tin planea pa:
- Sigi pa su nivel 4 na EPI mes, locual lo dura rond di un aña pa un aña y mey.
- Despues di caba nivel 4, e tin e meta pa sigui studia pa bira un IT Technician sea na Belgica of na Hulanda.
Sujohn ta termina encurashando tur studiante pa probecha di e oportunidad aki si nan haya e chance, ya cu e ta brinda un bon experencia pa nan futuro profesional.
