Den su informe nobo Estado di Ehecucion di Ley na Hulanda Caribense 2025, Conseho pa Ehecucion di Ley (Raad voor de Rechtshandhaving) ta spierta cu ehecucion di ley na Boneiro, Sint Eustatius y Saba ta keda structuralmente vulnerabel y, sin un refuerso substancial, e no ta prepara pa futuro.
Segun e Conseho, capacidad, control di frontera, intercambio di informacion, detencion, cuido forense y e enfoque riba criminalidad di hubentud ta keda bou di presion continuo. Na mes momento, e riesgonan di siguridad den e region Caribense ta aumentando debi na criminalidad subversivo, tensionnan geopolitico y un presion social creciente riba e islanan.
E Conseho ta nota cu Ministerio di Husticia y Siguridad ta tumando pasonan importante y ta duna sosten na e analisis anterior di e Conseho, pero cu riba puntonan crucial structural tin hopi poco medida concreto visible ainda. Como resultado, e riesgo ta keda cu e problemanan structural lo wordo resolvi solamente parcialmente of demasiado lentamente.
Tin preocupacion particular pa e situacion na Saba y Sint Eustatius. Segun e Conseho, e cadena di husticia penal y siguridad eynan ta opera cu limitacionnan y bacinan structural. Problemanan di capacidad, e falta di facilidadnan local y e dependencia riba Boneiro ta hiba na un acceso desigual na husticia pa e habitantenan di e islanan aki.
E Conseho tambe ta hala atencion explicitamente riba e ausencia continuo di un coordinacion central pa operacionnan basa riba inteligencia (intelligence-led) den e hub maritimo, e problema creciente di criminalidad di hubentud, e infraestructura digital inadecuado den e cadena di husticia, y e riesgonan rond di intercambio di dato den Reino.
Finalmente, e Conseho ta enfatisa cu proteccion di e estado de derecho den e parti Caribense di Reino ya no ta simplemente un asunto local, sino un asunto di siguridad estrategico pa henter Reino Hulandes.
Pesey, Conseho ta haci un yamado urgente na e ministernan pa fortalece e organisacionnan di husticia den forma sostenibel riba plano financiero, organisatorio y den termino di capacidad, y pa traduci intencionnan di maneho rapidamente den medidanan concreto y ehecutabel cu temponan structuralmente defini.
E informe Estado di Ehecucion di Ley na Hulanda Caribense 2025 ta disponibel riba e website di Conseho pa Ehecucion di Ley: www.raadrh.com.