College financieel toezicht Bonaire, Sint Eustatius y Saba (Cft) a bishita Sint Eustatius y Saba riba 25 y 26 di mei. Cft a papia cu e colegionan ehecutivo (bestuurscolleges) y consehonan insular (eilandsraden) btocante e situacion financiero actual, e entidadnan di gobierno y proyectonan cu ta coriendo. Na Saba, Cft a despedi di e gezaghebber saliente Jonathan Johnson. Cft ta constata riba tur dos isla un mihoracion stabil den e maneho financiero y ta enfatisa e importancia di prudencia den un ambiente cu ta cambiando.
Sint Eustatius
Cft ta constata cu e entidad publico a haci progreso importante den e añanan tras di lomba riba tereno di maneho financiero, cu e declaracion di auditor (accountantsverklaring) sin reserva pa 2024 como e resultado mas bisto. Banda di esaki, Sint Eustatius ta mustra plan nan pa mihora e capacidad di ehecucion y e isla ta sigui riba e caminda pa ta sosteniblemente ‘in control’. Ademas, Sint Eustatius tin den STUCO y EUTEL dos entidad cu ta cumpli cu tareanan publico importante y cu ta dispone di infrastructura esencial. Riba base di e informacion disponibel, e imágen cu Cft tin ta cu e entidadnan aki actualmente ta funciona relativamente stabil, aunke nan ta enfrenta retronan operacional den e proximo tempo. Durante e bishita, Cft a bishita e haf, The Cliff y e proyecto di vivienda social, caminda ta trahando 36 cas nobo di huur social. E proyectonan aki ta importante pa e desaroyo economico y social di Sint Eustatius. Cft ta constata cu ta logrando progreso bisto akinan.
Saba
Cft ta expresa un biaha mas su aprecio pa e calidad halto di e maneho financiero. E presupuestonan ta na orde y a wordo entrega a tempo. Cft ta constata tambe cu Saba ta mantene e linea positivo. Ademas, Saba tin den Saba Electric Company (SEC) y Satel dos entidad di gobierno cu ta cumpli cu un tarea publico y cu ta dispone di infrastructura importante. E entidadnan aki tambe ta funciona relativamente stabil a base di e informacion disponibel, aunke nan tambe ta enfrenta retronan operacional. Durante e bishita, Cft a despedi di gezaghebber Jonathan Johnson, kende ta baha despues di 18 aña. Señor Johnson a duna un contribucion importante na e stabilidad financiero y gobernacional actual di Saba. Cft a gradicie di curason pa su añanan di dedicacion y trabou.
Pa cluiri, pa tur dos isla ta conta cu nan ta opera den un mundo cu actualmente ta den hopi movecion. Esaki ta exigi atencion continuo pa un maneho financiero cuidao y resiliente.