Durante un reunion cu Dienst Inspectie van Onderwijs, parlamentario Eduard Pieters di fraccion di PPA a expresa un preocupacion creciente riba diferente señal alarmante den enseñansa na Aruba. Aunke e reunion tabata informativo y a enfoca riba plan di maneho, e peso laboral continuo y e reto adicional cu Dienst Inspectie tin cu e awor ‘Bureau Kinderopvang’ ta enorme. Dienst Inspectie for di 2009 ta cococha pa atende cu su responsabilidad manera mester ta. E inspectornan kier haci nan trabou, pero nan no tin suficiente recurso pa logra esaki. Dienst Inspectie ta sigui haya mas responsabilidad sin sosten adecua di gobiernonan pa nan vigila calidad di enseñansa na Aruba. Segun Pieters, e realidad den nos enseñansa a mustra cu Aruba no por sigui laga e problematica educativo acumula sin accion serio.
32% graduacion: “Esaki no por bira normal”
Un di e puntonan cu mas a preocupa PPA ta e situacion na Colegio Nigel Matthew, unda diferente mayor a expresa nan preocupacion riba e porcentahe di graduacion, cu ta solamente rond di 32%.
Segun Pieters, e preocupacion no ta solamente e cifra, pero tambe e sentimento creciente entre e mayornan, unda cu e sistema di evaluacion no ta refleha realmente e capacidad di e muchanan. “Mayornan ta sinti cu e muchanan ta wordo evalua riba un forma demasiado limita, specialmente den e kernvakken manera Hulandes, Ingles y Wiskunde, ya cu p.e. ta dos momento di evaluacion so ta determina si un mucha ta bay over of no,” Pieters a splica.
Pero loke mas a preocupa PPA tabata e miedo cu e mayornan ta sinti pa expresa nan preocupacionnan oficialmente.
“Mayor no mester tin miedo pa papia”
Segun Pieters, diferente mayor a expresa cu nan tin temor di represaya contra nan yiunan si nan sigui insisti riba e problematicanan na scol. “Esaki sigur ta algo hopi serio,” Pieters a enfatisa. “Ora un mayor tin miedo pa defende interes di su yiu, nos tin cu puntra nos mes, unda nos sistema educativo ta bayendo.”
Aunke Pieters a anima e mayornan pa sigui e caminda oficial y hiba nan preocupacion directamente na scol, el a bisa cu no por ignora e señal aki.
Nos mester bolbe kere den nos muchanan
Pa fraccion di PPA, e debate no por keda solamente riba porcentahe of resultado. Pieters a enfatisa cu e discusion mester bay hopi mas profundo: cultura educativo di calidad y e forma con nos ta mira nos muchanan y e maestronan.
“Nos ta kere den ‘teacher collective efficacy’,” Pieters a declara. “E maestronan mester kere cu nan por haci diferencia. E maestronan mester por kere cu hunto nan por haci un diferencia. Paso si nos cuminsa hinca den nos cabes cu e muchanan di p.e. San Nicolas no por, of cu e muchanan di ‘langere traject’ no por, nos mes ta limitando nan futuro y nos mantene e fenomeno di “self-fulfilling prophecy” y como resultado: berdad e muchanan lo sigui malo den nan estudio .”
Segun Pieters, e ambiente den scol mester ta uno “safe”/sigur, positivo y motivante, tanto pa maestro como studiante. Scol mester ta un lugar, unda e HENDE ta sinti cu nan por crece y progresa.
E maestronan ta cansa y Aruba no por sigui ignora esey
Pieters a pone enfasis tambe riba bienestar di maestro, indicando cu tin diferente investigacion empirico y señal den veld educativo, cu ta mustra cu hopi maestro ta cansa, fada, desmotiva y sintiendo falta di sosten total di tur gobierno. “Nos ta pidi hopi di nos maestronan sin percura pa e recursonan necesario pa nan haci nan vocacion,” el a bisa. “Nan ta traha cu alma y cuerpo pa nos muchanan. Pero si nos no cuida nan, eventualmente e sistema lo kibra.” Segun PPA, inversion den calidad di enseñansa no ta solamente traha edificio, cumpra material, organisa caminata y hisa salario, pero mester ta principalmente den inversion di e ser humano mes y den un forma integral.
“Un maestro cu ta sinti sosteni y balorisa, ta transmiti esaki naturalmente na e mucha,” Pieters a enfatisa.
Enseñansa no ta un gasto, ta inversion den futuro di Aruba
Den su conclusion, Pieters a manda un mensahe cla, cu Aruba no por sigui trata enseñansa como un asunto secundario. “Calidad di enseñansa no ta nace accidentalmente,” el a conclui. “E ta nace ora bo inverti den crecemento y bienestar di bo maestronan, ora bo scucha bo mayornan, ora bo crea un ambiente sigur pa mucha y maestro y ora bo kere realmente cu tur mucha na Aruba tin potencial pa logra exito.”
