E expansion di e sector hotelero y apertura di asina yama ‘new resorts’ na Aruba tabatin un impacto directo riba e workload di OM. Durante 2025, e Departamento di Documentacion Hudicial a ricibi un record di 9,458 peticion pa un Verklaring Omtrent het Gedrag (VOG of cedula di bon comportacion). Esaki ta un aumento di mas di mil peticion compara cu 2024, locual a genera Afl. 328,120 na ingreso pa e caha di gobierno. Di e cantidad aki, a rechasa 13 peticion debi na antecedente penal.
Den asuntonan di cooperacion internacional, OM a procesa 45 peticion di yudansa hudicial (rechtshulpverzoeken) cu a drenta for di exterior, y a manda 22 peticion pa e mesun area pafo di Aruba. Tambe a atende dos peticion di extradicion (uitleveringsverzoeken): uno for di Canada (cu a wordo ehecuta via un proceso cortico) y uno for di Francia (cu despues a wordo cancela). Ademas, e peticionnan pa topico di salud mental (Krankzinnigenverordening) a aumenta pa 45 caso.
